2024 წლის ზაფხულის მზებუდობის შემდეგ, თხის რქის ნიშანში სავსე მთვარე გველოდება. სწორედ ამიტომ, ითვლება, რომ 22 ივნისი მნიშვნელოვანი თარიღია. როგორც ასტროლოგები ამბობენ, სავსემთვარეობა თხის რქაში გავლენას თითოეულ ადამიანზე მოახდენს და არაერთი ცვლილებისა და სიახლის წინაშე დააყენებს.
22 ივნისი განსაკუთრებული ემოციურობით ხასიათდება. ამიტომაც, ნუ გაგიკვირდებათ, თუ მომატებულ შფოთვას იგრძნობთ და ადვილადაც გაღიზიანდებით. ასტროლოგების მთავარი რჩევაა, რომ ამ დღეს ნაჩქარევი გადაწყვეტილებები არ მიიღოთ და არც სპონტანურად დაგეგმოთ რაიმეს შეძენა. წინააღმდეგ შემთხვევაში, შესაძლოა, შედეგით შემდგომ პერიოდში განსაკუთრებით უკმაყოფილო აღმოჩნდეთ. ასევე, მომატებული ემოციურობის ფონზე, შესაძლოა, გაგიჩნდეთ სურვილი, ყოფილ პარტნიორს, შეყვარებულს მისწეროთ, ურთიერთობის განახლება შესთავაზოთ… არჩევანი, რა თქმა უნდა, თქვენზეა, მაგრამ შედარებით ემოციური პერიოდი მალევე გაივლის და შესაძლოა, ამ ნაბიჯის გამო ძალიან ინერვიულოთ. ნებისმიერი რამ, რაც დაუგეგმავი, სპონტანური, ნაჩქარევი და ამავდროულად, რადიკალურია, ჯობს 22 ივნისს არ განახორციელოთ.
აქვე, თუ დიდი ხანია, რაიმეზე ოცნებობთ, კონკრეტული საქმის, პროექტის განხორციელება გსურთ, მაგრამ ვერ ბედავთ, თხის რქაში სავსემთვარეობა იდეალური პერიოდია, რომ პირველი ნაბიჯები გადადგათ. თხის რქა ერთ-ერთი ყველაზე სტაბილური, შრომისმოყვარე და მიზანდასახული ნიშანია. ამიტომაც, გექნებათ შესაბამისი მოტივაცია, რომ თქვენი ოცნების საქმეებს შეეჭიდოთ.
ძირითადი აქცენტი კარიერასა და სწავლაზე გააკეთეთ. ყველაფერი, რასაც ახლა დაგეგმავთ ან განხორციელებაზე დაფიქრდებით, სამომავლოდ დიდ წარმატებას მოგიტანთ.
ასევე, ამ დღეს სახლის საფუძვლიანად დასუფთავება და მოწესრიგება განსაკუთრებით მნიშვნელოვანია. თხის რქას უწესრიგობა, ქაოსი და არეულობა არ უყვარს. თუმცა, პირველ რიგში, დაიწყეთ საკუთარი თავით – შეეცადეთ, უარი თქვათ ნეგატიურ აზრებზე. შეიქმენით პოზიტიური განწყობა, დაკავდით საყვარელი საქმით, აქტივობით. ამავდროულად, განიტვირთეთ, მოუსმინეთ სასიამოვნო მუსიკას, გაისეირნეთ. ასე შეძლებთ არა მხოლოდ ემოციური პერიოდის მარტივად გადალახვას, არამედ საკუთარ თავში არაერთ მნიშვნელოვან იდეასა და მიგნებას აღმოაჩენთ, რაც თვითგანვითარებაში დაგეხმარებათ. ასევე, მოერიდეთ იმ ადამიანებთან კომუნიკაციას, რომლებიც თქვენზე უარყოფით გავლენას ახდენენ. როგორც უკვე აღვნიშნეთ, განსაკუთრებული ყურადღება გამოიჩინეთ გადაწყვეტილებების მიღებისას – ნაჩქარევი, სპონტანური გადაწყვეტილებები შესაძლოა, იმაზე დამაზიანებელი აღმოჩნდეს, ვიდრე წარმოიდგენთ.
წყარო: “ბომონდი”