“აზაროვი საბოლოოდ მოხვდება იქ, სადაც მისი ადგილია” – ამის შესახებ აგენტმა მამუკა ჯუღელმა “ჯეო თიმთან” განაცხადა. დონეცკის „შახტარის“ მარცხენა მცველი ირაკლი აზაროვი ნაკრების Euro 2024-ის განაცხადში ვერ მოხვდა.
“ეს ამბავი შენგან გავიგე, არც ველოდებოდი სიაში რომ არ იქნებოდა. ირაკლი შახტარში გამორჩეული ფეხბურთელია, რომლის ტრანსფერის საკითხზეც უახლოეს დღეებში საფრანგეთის ლიგა 1-ის და სერია A-ს გამორჩეულ კლუბებს ვხვდები, ჩანიშნულია შეხვედრა შოტლანდიის ყველაზე ტიტულოვან გუნდთანაც.
ჩემთვის აზაროვი საქართველოს ერთ-ერთი საუკეთესო ფეხბურთელია და არამარტო, მის პოზიციაზე საუკეთესოა უკრაინაშიც. მჯერა, აზაროვი საბოლოოდ მოხვდება იქ, სადაც მისი ადგილია” – აღნიშნა მამუკა ჯუღელმა.