მსჯავრდებული მესამე პრეზიდენტის, მიხეილ სააკაშვილის განცხადებით, საქართველოს ჰიმნში ტექსტის ნაწილი მისი დაწერილია. ამის შესახებ სააკაშვილმა სოციალურ ქსელში დაწერა.
“თავისუფლება დღეს ჩვენი”
მინდა იცოდეთ, თუ საიდან წამოვიდა ჩვენი ჰიმნის იდეა. ასე 9 წლის ვიყავი, როცა დედაჩემს რუსთაველის გამზირით მივყავდი ინგლისურის გაკვეთილზე და ამ დროს შევესწარით ოპერის თეატრიდან ცნობილი ბარიტონის, დავით გამრეკელის გამოსვენებას.
მთელ რუსთაველზე დინამიკებში ჩართული იყო არია ზაქარია ფალიაშვილის დაისიდან “ოდა თავისუფლებას”, დავით გამრეკელის შესრულებით. გულში ჩამივარდა ამ არიის სიტყვები “თავისუფლება დღეს ჩვენი”. “ვარდების რევოლუციის” შემდეგ, როდესაც ჰიმნის შეცვლის საკითხი დადგა, მე კომისიას ეს მელოდია შევთავაზე. მალე ტექსტის პროექტიც მომიტანეს, რომელშიც ვერ ვიპოვე მთავარი სიტყვები “თავისუფლება დღეს ჩვენი”, ამიტომ ჩემი ხელით ჩავწერე:
“თავისუფლება დღეს ჩვენი,
მომავალს უმღერს დიდება;
დიდება თავისუფლებას,
თავისუფლებას დიდება.”
ძალიან ვამაყობ, როდესაც ეს სიტყვები მრავალგზის გამეორებული მესმის მოედნებზე და ქუჩებში.
არასდროს დამიწერია ეს, მაგრამ ახლა მინდა, რომ იცოდეთ. ვინაიდან, ჩემი ღრმა რწმენით, სწორედ სიტყვები “თავისუფლება დღეს ჩვენი” ყველაზე ზუსტად გამოხატავს ჩვენს გენეტიკურ კოდს,” – წერს მიხეილ სააკაშვილი.