“წელიწადნახევრის წინ, მთვრალ რუსებთან მოუვიდა კონფლიქტი, რომლებიც ამბობდნენ, რომ საქართველო რუსეთის ნაწილია”– ოკმელაშვილის ნათესავი შსს-ს განცხადებაზე

სარეკლამო კომპანია “ლიმონის” ოფისიდან სამართალდამცველებმა ტექნიკა წაიღეს.

პარალელურად, უკვე სამი საათია ჩხრეკა გრძელდება კომპანიის დამფუძნებლის, გიორგი ოკმელაშვილის საცხოვრებელ სახლში.

გიორგი ოკმელაშვილის ახლობელი შსს–ისგანცხადებას ეხმიანება, სადაც ნათქვამია, რომ ოკმელაშვილი წარსულში სხვადასხვა დანაშაულისთვის, მათ შორის პოლიციელებზე ძალადობის ბრალდებით დააკავეს. ოკმელაშვილის ახლობელი აცხადებს,რომ ოკმელაშვილს წელიწადნახევრის წინ კონფლიქტი მოუვიდა რუსებთან,რომლებიც საქარტველო რუსეთის ნაწილად მოიხსენიებდნენ.

“თითქოს მრავალგზის ნასამართლევი გიორგი ოკმელაშვილი დააკავეს – ეს იყო წელიწადნახევრის წინ, როდესაც მთვრალი რუსი ახალგაზრდები ერთ- ერთ ბარში არ იქცეოდნენ წესიერად და საუბრობდნენ რომ საქართველო რუსეთის ნაწილია, მათთან მოუვიდა კონფლიქტი, რის შედეგადაც მოხდა ფიზიკური დაპირისპირება. ესა გიორგის ნასამართლეობაზე რაც შემიძლია გითხრათ”– ამბობს ოკმელაშვილის ახლობელი გიორგი ჩხეიძე. 

შსს-ს განცხადებით, სარეკლამო კომპანია “ლიმონის” ხელმძღვანელი, გიორგი ოკმელაშვილი პოლიციელებზე თავდასხმის ბრალდებით დააკავეს, რაც 7 წლამდე ვადით თავისუფლების აღკვეთას ითვალისწინებს.

შსს–ის ინფორმაციით, გიორგი ოკმელაშვილი 13 მაისის აქციაზე “პოლიციელებზე თავდასხმის” ბრალდებით დააკავეს.