2024 წლის 15 მაისიდან პლანეტა მერკური კუროს ნიშანში გადადის, რაც, ასტროლოგების თქმით, ძალიან ბევრ ადამიანს ფინანსური თვალსაზრისით არაერთ სიახლესა და განსხვავებულ შესაძლებლობას ჰპირდება.
მერკური – აზროვნების, ინტელექტის, კომუნიკაციების, ვაჭრობისა და საგანმანათლებლო პროგრესის პლანეტა ყველაზე მატერიალურ და სტაბილურ ნიშანში გადადის და იქ 2 ივნისამდე დარჩება. შესაბამისად, აღნიშნულ პერიოდში მნიშვნელოვანი სიახლეები გელით. იმისათვის, რომ წარმატებას მიაღწიოთ და შესაძლებლობა სწორად გამოიყენოთ, შეგიძლიათ, რამდენიმე სხვადასხვა რეკომენდაცია გაითვალისწინოთ:
ფინანსური სფერო
აღნიშნულ პერიოდში სამომავლო გეგმისა და სტრატეგიის შემუშავება შესანიშნავი გადაწყვეტილებაა. ასევე, გადახედეთ თქვენს შემოსავალსა და ფინანსებს და დაზოგვის მექანიზმიც გაწერეთ. თუკი აღნიშნულ პერიოდში რაიმე ახალს დაიწყებთ, თქვენი მონდომება და შრომისმოყვარეობა დაფასდება და გაცილებით მეტ წარმატებას მიაღწევთ.
ურთიერთობების სფერო
ძალიან კარგი პერიოდია სტაბილური, გრძელვადიანი ურთიერთობების, პარტნიორობის, კომუნიკაციებისა და შეთანხმებების განსახილველად და დასამყარებლად. ამიტომაც, თუკი ამ თვალსაზრისით რაიმეს გეგმავთ, აღნიშნული პერიოდი გამოიყენეთ.
საგანმანათლებლო სფერო
შესანიშნავი პერიოდია სწავლისა და არსებული ცოდნის გასაღრმავებლად. ნახავთ, რომ იმაზე გაცილებით სწრაფად აზროვნებთ, ვიდრე აქამდე და შეგიძლიათ, ბევრი ინფორმაცია აითვისოთ.
30 და 31 მაისს მერკური კუროს ნიშანში ურანს შეუერთდება. ურანი დრამატული ცვლილებების, დამოუკიდებლობის, თავისუფლების, პროგრესის, ახალი ტექნოლოგიების პლანეტაა. წარმატება ელის იმ ადამიანებს, ვინც პროგრესზეა ორიენტირებული და წარსულში დატოვებულ საქმეებსა და ურთიერთობებს სამუდამოდ ემშვიდობება. გამოიყენეთ შესაძლებლობა და დრო ახალ იდეებს, საქმეებს, ცოდნასა და გეგმებს დაუთმეთ. წარმატების გაცილებით მეტი შანსი გექნებათ.
წყარო: “ბომონდი”