კარლსრუემ გერმანიის მეორე ბუნდესლიგის 32-ე ტურის შეხვედრაში სტუმრად ჰანზა ანგარიშით 2:1 დაამარცხა და ამაში დიდი წვლილი ბუდუ ზივზივაძესაც მიუძღვის, რომელმაც როსტოკში ეფექტური გოლი გაიტანა.
30 წლის ქართველმა თავდამსხმელმა თამაში სტუმართა სასტარტო შემადგენლობაში დაიწყო და პირველი წუთებიდან ძალიან აქტიური იყო. ჯერ ვარდნაში ცდილობდა ბურთის კარში გადაგზავნა, მაგრამ დარტყმა ძლიერი არ გამოუვიდა და მეკარე გაუმკლავდა. რამდენიმე წუთის შემდეგ ბუდუმ მაინც შეაგდო, მაგრამ გოლი გაუქმეს – VAR-მა გადაცემის მომენტში მის თანაგუნდელზე თამაშგარე მდგომარეობა აჩვენა.
ანგარიში 33-ე წუთზე ჰანზამ გახსნა და ტაიმი მოიგო კიდეც (1:0), ზივზივაძემ კი მიზანს შესვენების შემდეგ მიაღწია. 52-ე წუთზე, კარლსრუეს იერიშის დროს, ქართველმა ფორვარდმა ბურთი გაატარა და თავად საჯარიმოში შეიჭრა, მისმა ხორვატმა თანაგუნდელმა იგორ მატანოვიჩმა კი პასი არ დაუგვიანა და მანაც მარცხენა ფეხით ოსტატურად მოჭრა – 1:1. სულ რაღაც 4 წუთში მატანოვიჩმა სტუმრებს პენალტიც მოუპოვა, რომელიც მარვინ ვანიტცეკმა გოლად აქცია და მატჩის საბოლოო ანგარიში დააფიქსირა.
კარლსრუეს მთავარმა მწვრთნელმა კრისტიან აიხნერმა ბუდუ ზივზივაძე მოედნიდან 86-ე წუთზე გაიყვანა.
@lashababukhadia ბუდუს გოლი 👏🇬🇪 #გააზიარეთ #გააზიარეთ ♬ original sound – babukhadia