ახლახანს ცნობილი ქართველი მწერალი გარდაიცვალა

დრამატურგი, მთარგმნელი, მწერალი და პედაგოგი რეზო კვესელავა გარდაიცვალა. სამწუხარო ინფორმაციას სოციალურ ქსელში “მწერალთა სახლი” ავრცელებს.

“გარდაიცვალა დრამატურგი, მთარგმნელი, მსახიობი, პედაგოგი და სცენარისტი რეზო კვესელავა.
რეზო კვესელავა წლების განმავლობაში მუშაობდა კინოსტუდია „ქართული ფილმის“ რედაქტორად; სცენარის ავტორია ფილმებისა: „ვედრება“ (1967), „გზა შინისაკენ“ (1981), „ჩაკლული სული“ (1994), „კნუტ ჰამსუნის კავკასიური მისტერიები“ (დოკუმენტური, 2005) და სხვ. გადაღებულია ფილმებში: „იყო შაშვი მგალობელი“ (1970), „წისქვილი ქალაქის გარეუბანში“ (1981).
2008 წელს რეზო კვესელავას ავტორობით გამოვიდა წიგნი „მოგონებები ქართველ კინემატოგრაფისტებზე“, სადაც თავმოყრილია სხვადასხვა დროს ქართულ ჟურნალ-გაზეთებში გამოქვეყნებული მისი მემუარული სტილის წერილები ქართველ კინოხელოვანებზე.
რეზო კვესელავა ასევე ეწეოდა მთარგმნელობით საქმიანობას (ნ. ბერდიაევი, კ. ჰამსუნი, ვ. ნაბოკოვი, ლ. ფოიხტვანგერი).
მწერალთა სახლი ქედს იხრის რეზო კვესელავას ხსოვნისა და შემოქმედების წინაშე და სამძიმარს უცხადებს განსვენებულის ოჯახს”