ბოლო ერთი თვის განმავლობაში ლარი დოლართან მიმართებით 10 თეთრით გაუფასურდა. ერთი წლის მონაცემებით კი ეროვნული ვალუტა ყველაზე ცუდ ნიშნულზეა. ვალუტის ასეთივე გაუფასურება ბოლოს ნოემბერში მოხდა.
ისტორიული მაქსიმუმი დაფიქსირდა პირველ აპრილს. დღეს მდგომარეობა შედარებით გაუმჯობესდა და 1 დოლარის ღირებულება 3 თეთრით შემცირდა. ბოლო ერთკვირიანი გაუფასურების შემდეგ, ლარის გამყარების პირველი ნიშანი გამოჩნდა.
ბიზნესისა და ტექნოლოგიების უნივერსიტეტის ასოცირებული პროფესორის, ნიკოლოზ მჭედლიშვილის თქმით, ეროვნული ვალუტის სტაბილიზაციის ნიშნები რამდენიმე დღის წინ გამოჩნდა.
“ის, რომ ლარი დასტაბილურდებოდა რამდენიმე დღის წინ გამოჩნდა პირველი ტენდენცია. მაშინ, როცა ეროვნულმა ბანკმა 40 მილიონი დოლარი გამოიტანა გასაყიდად, ბაზარმა ეს ვერ აითვისა და გაიყიდა მხოლოდ 27 მილიონი დოლარი, რაც იმის ინდიკატორი იყო, რომ ბაზარი პრინციპში უკვე გაჯერებული იყო დოლარებით და აღარ უნდოდა დოლარების შეძენა. რა თქმა უნდა, ეს უკვე კარგია, იმიტომ, რომ უკვე იმპორტზე ძალიან მოქმედებს და იმპორტული საქონლის ფასებზე და შესაბამისად, უნდა ველოდოთ, რომ ფასები ისე აღარ გაიზრდება, როგორი მოლოდინიც იყო ამ ლარის გაუფასურების დღეებში,“ – განაცხადა ნიკოლოზ მჭედლიშვილმა.
ახალგაზრდა ფინანსისტთა და ბიზნესმენთა ასოციაციის ვიცეპრეზიდენტის, პაატა ბაირახტარის თქმით, ცენტრალურ ბანკს აქვს იმის რესურსი, თუკი ამის სურვილი აქვს, რომ კურსის ფორმირებაში გარკვეული სტაბილურობა შეიტანოს.
“ჩვენ არა ერთხელ ვნახეთ, რომ ცენტრალურ ბანკს აქვს იმის რესურსი და უნარი, როდესაც ამისი სურვილი არსებობს, რომ გარკვეული სტაბილურობა შეიტანოს კურსის ფორმირების დროს. ამისი ნათელი დასტური იყო ბოლო პერიოდში, როდესაც ცენტრალური ბანკი ჩაერია, გამოიტანა ინტერვენციაზე 40 მილიონი და ამან კურსი მეტ-ნაკლებად გაასწორა. მაგრამ რატომ გაიყიდა და რატომ აითვისა ბაზარმა მხოლოდ 27 მილიონი, იმიტომ, რომ ეს იყო დაგვიანებული მცდელობა,“ – ამბობს პაატა ბაირახტარი.