ზუგდიდში, ბარამიას ქუჩაზე მოკლული ქალი 70 წლამდე ქალი, მზია მიქავაა. მკვლელობის სავარაუდო მოტივი ძარცვაა. როგორც ირკვევა, საცხოვრებელ სახლში პირები გასაქურდად შეიჭრნენ, წინააღმდეგობის გაწევისთვის მოკლულის ქმარი, ტარიელ ჯიმშელია, სკამზე დააბეს და ფიზიკურად გაუსწორდნენ. დაშავებული ევექსის კლინიკაში გადაიყვანეს. ამ დროისთვის უცნობია როგორია მისი ჯანმრთელობის მდგომარეობა.
გავრცელებული ინფორმაციით, თავდამსხმელებმა აფხაზეთიდან დევნილი ჯიმშელიების დაყაჩაღება გაამთენიისას სცადეს. ქალი თავდამსხმელებმა თოკით გაგუდეს, კაცს კი დანა ჩაარტყეს. როგორც ცნობილია, ცოლ-ქმარი რამდენიმე თვის წინ მოსკოვიდან ჩამოვიდა და სავარაუდოდ, თავდამსხმელებს ჰქონდათ ინფორმაცია, რომ ისინი სახლში ძვირფასეულობას და ფულს ინახავდნენ. ადგილზე საგამოძიებო მოქმედებები ამ წუთებშიც მიმდინარეობს. პოლიციელები თავდამსხმელებს ეძებენ. შეგახსნებთ, რომ რამდენიმე საათის წინ, ბარამიას ქუჩაზე, დევნილთა დასახლებაში ოჯახის დაყაჩაღების მცდელობა მკვლელობით და დაჭრით დასრულდა.