ახლახან თბილისის კლასიკური გიმნაზიის ლეგენდარული დირექტორი გარდაიცვალა

თბილისის კლასიკური გიმნაზია სამწუხარო ინფორმაციას ავრცელებს:
,,ლიანა შეწირულის სახელი და ღვაწლი თბილისის კლასიკური გიმნაზიის ისტორიაში წარუშლელია. ის 32 წლის მანძილზე ხელმძღვანელობდა სკოლას, ქმნიდა ჰუმანურ გარემოს, იყო მოსწავლეთა და მასწავლებელთა ინტერესების დამცველი. აღმაფრთოვანებელი იყო მისი დიპლომატია, ურთიერთობების კულტურა, გულისხმიერი დამოკიდებულება ადამიანებისადმი. სკოლის ისტორიის ქარიშხლიან პერიოდში ქალბატონი ლიანას ძალისხმევა და სკოლაზე ზრუნვა საოცარი იყო. 1992 წელს, სამოქალაქო ომის დროს, როცა სკოლის შენობა დაიწვა და კრიზისული პერიოდი დადგა, ქალბატონი ლიანა გახლდათ უნიკალური ლიდერი, რომელმაც შეუძლებელი შეძლო, მაქსიმუმი გააკეთა სკოლის აღდგენა-აღორძინებისთვის. სასკოლო საზოგადოება მის მიმართ საოცარი კრძალვით, სიყვარულითა და პატივისცემით იყო განწყობილი, რადგან მასში ყველა გულწრფელ თანამგრძნობს, კეთილისმყოფელსა და მეგობარს ხედავდა. ლიანა შეწირულის სახელი დღემდე სიყვარულით იხსენიება გიმნაზიის კედლებში. ბევრ ჩვენს კოლეგას ახსოვს მისი თავდადებული მოღვაწეობა, დაუვიწყარ ისტორიებს ყვებიან მასზე. აკადემიზმი, მაღალი გემოვნება, შორსმჭვრეტელობა, ინტუიცია, იუმორი, კეთილგანწყობა მას საოცარ პიროვნულ ხიბლს სძენდა. გიმნაზიელების ხსოვნაში მუდამ იცოცხლებს ლიანა შეწირულის სახელი და ხსოვნა. მსუბუქი იყოს მისთვის მშობლიური მიწა!”-, ნათქვამია FACEBOOK პოსტში.