მასშტაბური გატაცება მექსიკის საზღვართან – უკვე სამი დღეა 30-მდე ქართველი მექსიკურ ნარკოკარტელს ჰყავს დაკავებული. გავრცელებული ინფორმაციით გატაცებულთა შორის არიან ქალებიც. ნარკოკარტელების მიერ დატყვევებულია 120 ადამიანი, მათგან 30 ქართველია. გამტაცებლები მძევლების გათავისუფლების სანაცვლოდ 90 000 დოლარს ითხოვენ, როგორც ცნობილია, ამ თანხის ნახევარი უკვე გადახდილია.
ვრცელდება ვერსიები, რომ ეს ფაქტი ნარკოკარტელის მხრიდან ადამიანების გატაცების პირველი შემთხვევა არ არის და ის ტყვეების გათავისუფლებისთვის სოლიდურ თანხებს ხშირად ითხოვს, მეორე ვერსიის თანახმად, ნარკოკარტელი მჭიდრო კავშირშია იმ გადამყვან ორგანიზაციებთან თუ ფიზიკურ პირებთან, რომლებსაც ადამიანები ამერიკაში არაკანონიერი გზით გადაჰყავთ.
გატაცებულების ახლობლები დახმარებას ითხოვენ. ისინი დაზარალებულებთან ბოლო კონტაქტის დეტალებზე საუბრობენ. “ტყვეობაში ვარ, ნარკოკარტელებთან, ტრეფიკინგის მსხვერპლი ვარ. გაგვიტაცეს და ფულს ითხოვენ. რაღაც დაჯგუფებაა. 30 კაცი ვართ და 90 ათასს ითხოვენ…შეიძლება ცოტა ხანში [ტელეფონი] ისევ წაგვართვან, ძმაო, რაღაც სარდაფში ვართ 120 კაცი დამწყვდეული. ველოდებით გაყვანას…იარაღი დამადეს და მეორე დანის კონდახს მირტყამდა იმის გამო, რომ 2 ესპანური სიტყვა ვიცოდი. ყვიროდნენ და მირტყამდნენ. არ ვიცი რატომ.” – წერს ერთ-ერთი გატაცებული მოკლე ტექსტურ შეტყობინებაში.
აღნიშნულ საკითხს გამოეხმაურა საქართველოს საგარეო საქმეთა სამინისტრო.
“საელჩო კავშირზეა მექსიკის საიმიგრაციო სამსახურთან დამატებითი ინფორმაციის მიღების მიზნით და არკვევს მოქალაქეთა შესაძლო ადგილსამყოფელს. საელჩო კავშირზე რჩება მოქალაქეთა ოჯახის წევრებთან, მათთან, ვინც მიმართა საელჩოს ოჯახის წევრის ადგილსამყოფელის დადგენის მიზნით” – ნათქვამია განცხადებაში.