Meta-ს სოციალური მედიის პლატფორმებზე დაფიქსირებული შეფერხება, კომპანიას ძვირად დაუჯდება.
კონკრეტული თანხა ჯერჯერობით უცნობია, თუმცა ამჟამინდელი მონაცემების მიხედვით, Meta-ს სააქციო ფასი უკვე 1.5%-ით დაეცა. ეს კი თავის მხრივ სოციალური მედიის ყველა სხვა საიტზე აისახა.
ექვსსაათიანი შეფერხება, რომელიც ცუკერბერგის დაარსებულ ყველა პლატფორმაზე 2021 წელს გავრცელდა, Meta-ს 100 მილიონი დოლარად დაუჯდა. ეს იმიტომ მოხდა, რომ კომპანიამ გაუმართავი განახლება განახორციელა, რის გამოც სერვერები გაითიშა და ინჟინრებს სანტა კლარას მონაცემთა ცენტრში წასვლა მოუწიათ, რათა ხარვეზი პირადად გამოესწორებინათ.
ცნობისთვის, “ფეისბუქი”, “მესენჯერი” და “ინსტაგრამი” გათიშული იყო, რის გამოც მომხმარებლებს თავიანთ ანგარიშებზე (ექაუნთებზე) წვდომა შეუჩერდათ. აპლიკაციებში პრობლემები, ჩვენი დროით, დაახლოებით 19: 20 საათიდან დაფიქსირდა. ანგარიშზე წვდომა არა მხოლოდ ვებსაიტზე, არამედ მობილურის აპლიკაციებშიც შეწყვეტილი იყო. პრობლემა მთელი მსოფლიოში დაფიქსირდა.
სოციალური მედიის გათიშვის მიზეზი უცნობია.
Meta-ს სპიკერმა, ენდი სტოუნმა X-ზე (ყოფილი “თვითერი”) პოსტი გამოაქვეყნა, რომელშიც სოციალური მედიის პრობლემას გამოეხმაურა: “ვიცით, რომ ხალხს ჩვენს სერვისებზე წვდომა უჭირთ. ჩვენ ერთად ვმუშაობთ ამის გამოსწორებაზე”.
წყარო: dailymail