კანონპროექტის თანახმად, რომელიც “კორუფციის წინააღმდეგ ბრძოლის შესახებ” კანონში ცვლილებების შეტანას ითვალისწინებს, პრეზიდენტს, პარლამენტის წევრს, მინისტრებსა და მათ მოადგილეებს, აჭარისა და აფხაზეთის ავტონომიური რესპუბლიკების მთავრობის თავმჯდომარეებს, უმაღლესი საბჭოს დეპუტატებს ნარკოლოგიური შემოწმების ვალდებულება აღარ ექნებათ. ინიციატივის ავტორები “ქართული ოცნების” დეპუტატები არიან.
კანონპროექტს სამოქალაქო აქტივისტი ლადო სადღობელაშვილი სოციალურ ქსელში ეხმიანება:
“უქმდება კანონით განსაზღვრული ვალდებულება, რომელიც დაკავშირებულია საქართველოს პრეზიდენტის, პარლამენტის წევრების, მინისტრების, მათი პირველი მოადგილეებისა და მოადგილეების, ასევე აფხაზეთისა და აჭარის ავტონომიური რესპუბლიკების უმაღლესი წარმომადგენლობითი ორგანოების წევრებისა და მთავრობის წევრების მიერ ნარკოლოგიური შემოწმების გავლასთან. შესაბამისად, უქმდება ნარკოლოგიური შემოწმების გავლისთვის თავის არიდებაზე დადგენილი ჯარიმა, რომლის ოდენობაც 500 ლარია.
– არის თუ არა ეს ირიბად იმის აღიარება რომ ხელისუფლება გატენილია ნარკომანებით? – წერს სადღობელაშვილი.