მართალია, მიწაზე რომ დავაბიჯებთ, სულ არ ვფიქრობთ, რა არის ჩვენს ქვემოთ, მაგრამ იქ იმალება წიგნის ფურცლების მსგავსი კომპლექსური შრეები, რომლებზეც დედამიწის ისტორიაა დაწერილი, ჩვენი ისტორია.
ახალმა კვლევამ დედამიწის შორეული წარსულის ერთი სრულიად ახალი თავის მტკიცებულებას მიაგნო — როგორც ჩანს, დედამიწის შიდა ბირთვს შიგნით სხვა, კიდევ უფრო შიდა ბირთვი აქვს.
„ტრადიციულად ვფიქრობდით, რომ დედამიწას ოთხი მთავარი შრე აქვს — ქერქი, მანტია, გარე და შიდა ბირთვები“, — განმარტავს ავსტრალიის ეროვნული უნივერსიტეტის გეოფიზიკოსი ჯოან სტივენსონი.
დედამიწის ქერქს მიღმა არსებულის შესახებ ძირითადად ვულკანური ამოფრქვევებისა და სეისმური ტალღების წყალობით ვიცით. ასეთ არაპირდაპირ დაკვირვებებზე დაყრდნობით, მეცნიერებმა გამოიანგარიშეს, რომ წარმოუდგენლად ცხელი შიდა ბირთვი, რომლის ტემპერატურაც 5000 გრადუს ცელსიუსს აღწევს, დედამიწის მთლიანი მოცულობის მხოლოდ ერთ პროცენტს შეადგენს.
ამჯერად, სტივენსონმა და მისმა კოლეგებმა იმის კიდევ უფრო მეტი მტკიცებულება იპოვეს, რომ დედამიწის შიდა ბირთვს შეიძლება, ერთმანეთისგან განსხვავებული ორი შრე ჰქონდეს.
„ძალიან ამაღელვებელია და შეიძლება ნიშნავს იმასაც, რომ სახელმძღვანელოების ხელახლა დაწერა მოგვიწიოს“, — ამბობს სტივენსონი.
კვლევისათვის ჯგუფმა გამოიყენა ძებნის ალგორითმისა და შიდა ბირთვის ათასობით მოდელი, რომლებიც მრავალი ათწლეულის განმავლობაში საერთაშორისო სეისმური ცენტრის მიერ დედამიწის სიღრმიდან მომდინარე სეისმური ტალღების საშუალებით შეგროვებული მონაცემებით შექმნეს.