ცოტა ხნის წინ ლეგენდარული პორტუგალიელი მწვრთნელი არტურ ჟორჟე 79 წლის ასაკში გარდაიცვალა – აღნიშნულის შესახებ წამყვანმა პორტუგალიურმა გამოცემამ, A Bola-მ დაწერა.
როგორც ცნობილია, არტურ ჟორჟე ხუთშაბათს დილით, ლისაბონში ხანგრძლივი ავადმყოფობის შემდეგ გარდაიცვალა.
ფეხბურთელის რანგში არტურ ჟორჟე „პორტუში“, „აკადემიკაში“, „ბელენენსესში“ და „ბენფიკაში“ თამაშობდა, რომელთან ერთადაც ოთხჯერ გახდა პორტუგალიის ჩემპიონი. პორტუგალიის ნაკრებში მან 16 მატჩი ჩაატარა და ერთი გოლი გაიტანა.
მწვრთნელობისას არტურ ჟორჟეს მთავარი წარმატება იყო 1986-87 წლების სეზონში ჩემპიონთა თასის მოგება „პორტუს“ თავკაცის რანგში. ის ასევე წვრთნიდა „პარი სენ-ჟერმენს“, რომელიც საფრანგეთის ჩემპიონობამდე და საფრანგეთის თასის მოგებამდე მიიყვანა.