გუშინ ღამით, თბილისში, მეტეხის ხიდზე, ავტომობილი მოაჯირს შეეჯახა და წყალში გადავარდა. საგანგებო სიტუაციების მართვის სამსახურის თანამშრომლებმა მანქანა წყლიდან დღეს დილით ამოიყვანეს.
დაღუპულია მამაკაცი. გარდაცვლილი გურამ (გია) ფოცხვერაშვილია.
მისი ყოფილი მეუღლე, ლილიკო ხარატიშვილი, AMBEBI.GE-სთან ინტერვიუში დაღუპულის ბოლოდროინდელ პრობლემებზე საუბრობს.
„ – მე და გია 18 წელი ვცხოვრობდით ერთად, სამი საერთო შვილი გვყავს. მე და გია ხუთ წელზე მეტია ერთად აღარ ვართ, ის მარტო ცხოვრობდა თბილისში, სხვა ოჯახი არ ჰყოლია. წუხელ ლაივს ვუყურებდი ტიკ-ტოკში, როდესაც ეს ავარიის ამბავი გავრცელდა, არც ვიცოდი, რომ გიას მანქანა იყო გადავარდნილი.
შემდეგ ჩემმა გოგონამ დამირეკა, გია დაიღუპაო, მამიდაშვილს უთქვამს. რა მოხდა არ ვიცი, ბოლო პერიოდში ცოტა პრობლემები ჰქონდა, მაგრამ ისეთ დონეზე მისულიყო, რომ თავისი თავი ასე გაეწირა არ მჯერა, ვერ წარმოვიდგენ ასეთ რამეს.
– ბოლოს როდის ესაუბრეთ?
– გუშინ მომწერა მესიჯი, უმცროსი ბავშვისთვის, რომელიც 12 წლის არის, ფული უნდა ჩაერიცხა, იმაზე ვესაუბრებოდი. უფროსები სრულწლოვანები არიან. მომწერა არ მაქვსო, მეტი პასუხი არ დამიბრუნებია.
– სად მუშაობდა?
– ხელოსანი იყო წლები, ბინებს არემონტებდა. შვილები ძალიან განიცდიან მომხდარს.
– მარტო იჯდა ხომ მანქანაში?
– დიახ, ასე დაიწერა, მეც ინტერნეტში ვკითხულობ რა მოხდა. თავიდან თითქოს წერდნენ რომ ოთხი ადამიანი დაიღუპაო და ბოლოს აღმოჩნდა, რომ მარტო გია იყო მანქანაში“.