მსახიობი ნატა ბერეჟიანი პირველად 22 წლის ასაკში გახდა დედა. მას ბიჭი შეეძინა – დათუნა, რომელიც გამორჩეული გარეგნობით ყოველთვის ყურადღებას იპყრობს.
ნატა ბოლო წლებში აქტიურად იყო დაკავებული კარიერით – როლებით კინოსა და თეატრში. რეჟისორ დათო დოიაშვილთან “მეფე ლირზე” მუშაობისას შეიტყო, რომ 18-წლიანი შუალედის შემდეგ მეორე შვილზეა ორსულად, თუმცა ამას ხელი არ შეუშლია, რომ წარმატებით ეთამაშა პრემიერა და სპექტაკლში დღემდე აქტიურად არის ჩართული.
პირველი შვილის გაზრდაში ნატას ოჯახის წევრები ეხმარებოდნენ, ახლა კი გეგმავს, რომ გოგონა თავად გაზარდოს და სადაც საშუალება იქნება, ყველგან თან ატაროს, უნდა, რომ მაქსიმალურად დიდი დრო დაუთმოს შვილს, ისე, რომ საკუთარ საქმესაც არ მოწყდეს.
ნატა ხშირად აკვირდება სარკეში საკუთარ თავს, შიშობს, ნაოჭ არ გაუჩნდეს. კოსმეტოლოგს 6 თვეში ერთხელ აკითხავს. სხვადასხვა სახის გამწმენდ და მკვებავ საშუალებას იყენებს. არც შინაურ რეცეპტებზე ამბობს უარს. ამ ყველაფერზე ჟურნალ “სარკეს” ესაუბრა:
– ნატა, პირველმა ორსულობამ იმოქმედა თქვენს წონასა და ფიგურაზე?
– ბევრი მოვიმატე. სამშობიაროში რომ მივედი, 100 კილო ვიყავი. იმ პერიოდში სარკეში რომ ვიხედებოდი, სულ მეტირებოდა. ბავშვის გაჩენის დღიდან ინტენსიურად დავიწყე ვარჯიშებზე სიარული. ჩვილიან დედებს შედედებულ რძეს და ორცხობილებს ურჩევენ, თითქოს რძეს უმატებს მკერდში. სისულელეა! თუ რძე აქვს დედას, აქვს. თუ არადა – არა! მენიუდან კალორიული საკვები ამოვიღე. დათუნა 3 თვისაც არ იყო, ორსულობამდე რა წონისაც ვიყავი, იმაზე ნაკლებს რომ ვიწონიდი.
– ეკრანზე ხშირად მაკიაჟის გარეშე ჩნდებით. ცხოვრებაშიც არ ხმარობთ კოსმეტიკას?
– ეკრანზე მაქვს მაკიაჟი, ოღონდ მსუბუქი, საეკრანო. ცხოვრებაში კი ნამდვილად არ მიყვარს, მხოლოდ ტუშს ვიყენებ. თუ სადმე მივდივარ, სადაც მაკიაჟია საჭირო, თვალის ჩრდილს ვისვამ. არ მიხდება ისეთი მაკიაჟ, სადაც თვალიც და ტუჩიც ერთნაირად, მკვეთრად არის შეფერილი.
სულ ვამბობ, რომ მსახიობს კანის მოვლისთვის ცალკე უნდა ჰქონდეს თანხები გამოყოფილი. ყველანაირად ვცდილობ კანს მოვუარო. დამცინიან კიდეც, ზაფხულში სულ ხილის ნიღბებს რომ ვიდებ. სეზონზე რაც შემოდის, ყველაფერს სახეზე ვიდებ. ვდგავარ სარკესთან და ვაკვირდები, თვალთან ნაოჭი ხომ არ გამიჩნდა…