ყოფილი სახალხო დამცველი და „საქართველოს ეროვნული ორბიტის“ დამფუძნებელი, ნინო ლომჯარია სოციალურ ქსელში საჯარო სამსახურებთან დაკავშირებით პოსტს წერს:
“ორი სიტყვა მინდა საჯარო სამსახურზე დავწერო:
1. ჩვენ ვართ პროგრესისკენ მიდრეკილი ხალხი. გვაქვს მოთხოვნილება ვიყოთ საუკეთესოები ყველა სფეროში, გვაქვს სიახლეების სწრაფად ათვისების, გამორჩეულად ყოფნის მისწრაფება;
2. საჯარო თუ კერძო სექტორი უდიდესი ენთუზიაზმით იტაცებს ინოვაციებს და როდესაც ამას ემატება ხელმძღვანელის მხრიდან დაკვეთა, საოცარი სინერგია იქმნება. საკუთარი თვალით მაქვს ნანახი, როგორი მოტივაციით მუშაობდნენ საჯარო მოხელეები და რამხელა შთაბეჭდილებას და აღფრთოვანებას იწვევდა ეს რეფორმები თუ ინოვაციური პროექტები საერთაშორისო წრეებში;
3. წლებია, რაც საჯარო სამსახურში არც ერთ სფეროში არ ყოფილა ამბიციური, პროგრესული პროექტების განხორციელების ინიციატივები; რეფორმები ჩაააცვლა უღიმღამობამ, არაფრით გამორჩეულობამ ან პარტიის საარჩევნო ბეღელად ყოფნამ. თანამდებობებზეც აღნიშული კრიტერიუმებით ირჩევიან და ინიშნებიან. დიდი ხანია, არც ერთ სახელმწიფო უწყებას არ უამაყია, რომ ის ან მის მიერ განხორციელებული რეფორმა საერთაშორისო ასპარეზზე გამორჩეულად აღიარეს, სხვა ქვეყნებისთვის მაგალითად აქციეს. ქართული ოცნების პირობებშიც კი ჰქონდა ამას ადგილი, მე თავად ვიყავი სხვადასხვა საჯარო სამსახურის საერთაშორისო აღიარებების მონაწილე თუ მომსწრე.
4. უძრაობა საღდება როგორც სტაბილურობა, როგორც მიღწევა;
5. კორუფცია წახალისებულია – თანამდებობაზე ყოფნა ნიშნავს შესაძლებლობას მოიხვეჭო შენთვის და შენი გარემოცვისთვის მაქსიმალური, რაც მოესწრება შენი იმ ადგილას ყოფნის დროს.
ეს ყველაფერი ჩვენ ბუნებრივ მდგომარეობას ეწინააღმდეგება. ტყუილია, რომ ქართველებს ეს მოსწონთ, ტყუილია, რომ ეს არის ჩვენთვის ყველაზე კომფორტული მდგომარეობა. ამიტომ არის ამხელა იმედგაცრუება, ამიტომ გაექცა ბევრი უპერსპექტივობას სხვა ქვეყანაში… ვიცი დამღლელია, მაგრამ უნდა დავიბრუნოთ ის მოტივაცია და სიხალისე, რაც ჩვენი ქვეყნის მშენებლობის, ჩვენი გაკეთებული საქმეებით სიამაყეს ახლავს თან. უნდა ვიპოვოთ, შევაკავშიროთ ეს გაფანტული ძალისხმევა და ვაქციოთ იგი დადებით, პროგრესულ, მომავლისკენ ორიენტირებულ, სიძლვილისგან დაცლილ ენერგეტიკად,”- წერს ლომჯარია.