“ბავშვებმა რა დააშავეს, რომ უვარგისი ერის და სახელმწიფოს წიაღში გაჩნდნენ, თორემ უფროსების მიმართ სიბრალულის გრძნობა დავკარგე” – დეკანოზი ილია ჭიღლაძე

დეკანოზი ილია ჭიღლაძე სოციალური ქსელით საქართველოში გუშინ მომხდარი ტრაგედიის შესახებ პოსტს აქვეყნებს.

ის, საჰაერო ბურთის ჩამოვარდნის გამო, 3 ადამიანის დაღუპვასა და ბაღდათში, მეწყერის ჩამოწოლის შედეგად, მომხდარ ტრაგედიას ეხება.

„ტრაგედიების დღე იყო დღეს და გუშინ საქართველოში, თუმცა ყველა მათგანის აცილება შეიძლებოდა თუ:

ა) მეწყერსაშიში ზონიდან ხელისუფლება დროულად გაასახლებდა ოჯახებს ნორმალურ ახალ საცხოვრებელ გარემოში;
ბ) საჰაერო ბურთის რეკორდული ხანგრძლივობის ფრენას კარგ ამინდში ჩაატარებდნენ და არა ასეთ უსაზიზღეს, კატასტროფულ ამინდში,ზამთარში.
რავიცი, რავიცი… გლოვა და სამძიმრები ხომ ეროვნული სპორტია საქართველოში, ხოლო პრევენცია და სიფრთხილე მიუღწეველი და უცნობი ფენომენია ქართველებისთვის. ისევ, ჰაგიოგრაფიაზე იმსჯელე, ერო, მეტი რა დაგრჩენია.
პატრიარქი შიოლაშვილი და საპატრიარქოს FB გვერდი კი სამძიმრების ნამდვილი რეკორდსმენია მსოფლიოში, ვთხოვ გინესის რეკორდების რედკოლეგიას, გადაამოწმონ, არ ვცდები:)
რა აჩერებს ასობით (ან იქნებ ათასობით) ოჯახს, რომლებიც ოფიციალურად მეწყესაშიშად მონიშნულ ზონებში ცხოვრებას აგრძელებენ, რატომ ჩუმდებიან და არ ატეხენ პროტესტის უკიდურეს ზომებს თავიანი მუნიციპალიტეტების ადმინისტრაციულ შენობებთან, მე ეს არ მესმის. ბავშვებმა რა დააშავეს, რომ უვარგისი ერის და სახელმწიფოს წიაღში გაჩნდნენ, თორემ უფროსების მიმართ სიბრალულის გრძნობა დავკარგე: არსებული კატასტროფული ვითარება საქართველოში მთელი სრულწლოვანი მოსახლეობის პასუხისმგებლობაა“, – წერს ის.