პრემიერმინისტრობის კანდიდატის, ირაკლი კობახიძის ცოლი, ნატალია მოწონელიძე პრემიერმინისტრთან ანგარიშვალდებულ უწყებას – სსიპ “საჯარო და კერძო თანამშრომლობის სააგენტოს” ხელმძღვანელობს. თავდაპირველად ინფორმაცია “რადიო თავისუფლებამ” გაავრცელა.
“საჯარო და კერძო თანამშრომლობის სააგენტო” საჯარო სამართლის იურიდიული პირია, რომელიც 2018 წელს მიღებული კანონის საფუძველზე შეიქმნა, მაშინ პრემიერმინისტრი მამუკა ბახტაძე იყო. სააგენტომ ფუნქციონირება 2019 წლის თებერვლიდან დაიწყო.
“საჯარო და კერძო თანამშრომლობის სააგენტოს ხელმძღვანელობს თავმჯდომარე, რომელსაც თანამდებობაზე ნიშნავს და თანამდებობიდან ათავისუფლებს საქართველოს პრემიერმინისტრი”, – აღნიშნულია სააგენტოს ვებგვერდზე.
ნატალია მოწონელიძე 2019 წლიდან სააგენტოში თავმჯდომარის მოადგილე იყო, ამავე წლის ნოემბრიდან გახდა თავმჯდომარის მოვალეობის შემსრულებელი, ხოლო 2021 წლის დეკემბრიდან დღემდე თავმჯდომარის პოსტს იკავებს.
ირაკლი კობახიძის ბოლო დეკლარაციის მიხედვით სააგენტოში მოწონელიძის წლიურმა ხელფასმა 85377,6 ლარი შეადგინა, რაც თვეში 7 114-ლარიან შემოსავალს გულისხმობს. პრემიერმონისტრობის კანდიდატი და მისი ცოლი თბილისის სახელმწიფო უნივერსიტეტშიც ასწავლიან – მოწონელიძე ასოცირებული პროფესორია – წლიურმა ხელფასმა 11 472 ლარი შეადგინა, კობახიძე პროფესორი – მისი წლიური შემოსავალი ამ სამსახურიდან 13 989,6 ლარი იყო. როგორც უმრავლესობის ლიდერის წლიური ხელფასი – 61 168,32 ლარი.
კანონმდებლობის მიხედვით, არ შეიძლება მოხელეს დაეკისროს სამსახურებრივი ზედამხედველობა იმ ორგანიზაციებისადმი, რომელთა ხელმძღვანელ ორგანოებში საქმიანობენ მისი ოჯახის წევრები.