19 იანვარი სახელგანთქული მოცეკვავისა და ქორეოგრაფის ნინო რამიშვილის დაბადების დღეა.
ნინო რამიშვილი 1910 წლის 19 იანვარს ბაქოში დაიბადა.
მან მეუღლესთან, ილიკო სუხიშვილთან ერთად, შექმნა საქართველოს ხალხური ცეკვის სახელმწიფო ანსამბლი, ლეგენდარული „სუხიშვილები“, რომლის წამყვანი მოცეკვავე 1972 წლამდე თავად იყო. ნინო რამიშვილმა ანსამბლთან ერთად თითქმის მთელი მსოფლიო შემოიარა.
ცნობილ ქორეოგრაფს მინიჭებული აქვს საქართველოს სახალხო არტისტის და სსრკ-ის სახალხო არტისტის წოდება; დაჯილდოებულია რუმინეთის ოქროს ვარსკვლავის ორდენით; ახალგაზრდობისა და სტუდენტობის მეოთხე ფესტივალზე მიღებული აქვს ოქროს მედალი და მსოფლიო ლაურეატის წოდება. საკონცერტო მოღვაწეობისთვის მიენიჭა შოთა რუსთაველის სახელობის სახელმწიფო პრემია, ასევე თბილისის საპატიო მოქალაქის წოდება.
ნინო რამიშვილი 2000 წლის სექტემბერში, 90 წლის ასაკში გარდაიცვალა. დაკრძალულია მწერალთა და საზოგადო მოღვაწეთა დიდუბის პანთეონში.