მომღერალი ზურა დოიჯაშვილი 14 თებერვალს გარდაიცვალა. მისი მეუღლე ქეთი ვადაჭკორია 2 თვის წინ ჟურნალ „სარკეს“ უამბობდა, თუ როგორ სურდა ზურას სამშობლოში დაბრუნება.
გთავაზობთ ინტერვიუდან ამონარიდს:
– სანამ ლაპარაკი შეეძლო, სულ ამბობდა, რომ ისე არ წავიდოდა ამქვეყნიდან, საქართველოში არ დაბრუნებულიყო, სანამ მისი მდგომარეობა კრიტიკულად დამძიმდებოდა და ფიზიკურად იყო საშუალება, რომ გადმოგვეყვანა საქართველოში, ვერ მოვახერხეთ. ძალიან სწრაფად დამძიმდა და აპარატზე შეაერთეს.
ვერ იყო კარგად, ფილტვები აწუხებდა, წონაში კლება, სისუსტე დაეწყო, სახსრები სტკიოდა, მოძრაობა უჭირდა… როცა სახლიდან გაგვყავდა სასწრაფოთი, მაშინ მისი ბოლო წინადადება იყო: „დავიჯერო, ისე წავალ ამქვეყნიდან, რომ თბილისში ფეხს ვერ დავადგამ?“
– ნანობდა საქართველოდან წასვლას?
– ყველამ იცის საქართველოდან ჩვენი წამოსვლის მიზეზი ზურას არ უნდოდა პრობლემებით ვინმეს შეწუხება. აქ ვმუშაობდით, რომ მერე დავბრუნებულიყავით. მაგრამ ის დაავადდა. მისი დაავადება გახლავთ, გვერდითი ამიოტროფიული სკლეროზი. ეს არის ძალიან იშვიათი დაავადება. მსოფლიოში გავრცელების ძალიან დაბალი პროცენტია, ამავე დროს, ზურას შემთხვევაში, ძალიან აგრესიული ფორმა იყო, რომელიც საკმაოდ სწრაფად პროგრესირებდა.