„რადიო თავისუფლების“ ცნობით, სამების საკათედრო ტაძრიდან წმინდა მატრონას ხატი გაიტანეს.
„რადიო თავისუფლებასთან“ საუბარში პარტია „პატრიოტთა ალიანსის“ ლიდერმა, დავით თარხან-მოურავმა, რომელიც წმ. მატრონას სტალინის გამოსახულებიანი ხატის შემწირველია, განაცხადა, რომ ხატი მას არ გაუტანია, მან მხოლოდ „საპატრიარქო და ხატმწერი დააკავშირა ერთმანეთთან“.
შეგახსენებთ, იანვრის დასაწყისში დეკანოზმა ილია ჭიღლაძემ სოციალურ ქსელში გაავრცელა ინფორმაცია, რომ სამებაში განთავსებული იყო წმ. მატრონას ხატი, რომელზეც საბჭოთა ბელადი, იოსებ სტალინიც, იყო გამოსახული.
აღნიშნულ ფაქტს საზოგადოებაში დიდი გამოხმაურება მოჰყვა.
ამის შემდეგ აქტივისტმა ნატა ფერაძემ გაავრცელა ვიდეო, რომელშიც ჩანს, რომ ხატს საღებავი შეასხეს.
ამას მოჰყვა საქართველოს საპატრიარქოს საგანგებო განცხადება ხატთან დაკავშირებით.