რა სიმპტომებით გამოირჩევა გრიპის ვირუსი, რომელიც ახლა არის გავრცელებული ქვეყანაში და როგორ უნდავმართოთ ის სახლის პირობებში? ამის შესახებ ინფექციონისტი მაია ბუწაშვილი „ნეტგაზეთს“ ესაუბრა.
“გრიპი ყოველწლიურად იყო პრობლემური დაავადება თავისი მძიმე სიმპტომებით და შესაძლო გართულებებით, როგორიც არის ფილტვის ანთება, ბრონქიტი, სუნთქვის უკმარისობა და ა.შ.
პირველ რიგში, მოთმინებით უნდა შევხვდეთ ცხელებას. ადამიანებისთვის მთავარი ამოცანა ხდება ხოლმე, რომ თერმომეტრზე ნორმალური ტემპერატურა დაინახონ და ყველაფერს აკეთებენ ამისთვის. ეს არ უნდა იყოს თვითმიზანი. რა თქმა უნდა, ცხელებას უნდა ვებრძოლოთ იმ მასშტაბით, რამდენადაც დისკომფორტს გვიქმნის, მაგრამ 5-7 დღე მშვიდად უნდა დაველოდოთ. თუ ტემპერატურა ძალიან მაღალია, 5-7 დღეზე მეტხანს გახანგრძლივდა, ან არ ემორჩილება სიცხის დამწევებს, მაშინ უკვე უნდა მივიღოთ სამედიცინო დახმარება”– ამბობს ბუჭაშვილი.
თუმცა,ის დასძენს, რომ რისკ-ჯგუფების – ბავშვებში, მოხუცებში, ორსულებში, ქრონიკული დაავადებების მქონე ადამიანების შემთხვევაში, ალბათ, განსხვავებული მიდგომაა საჭირო.
“თუ ჩვილს აქვს მაღალი ცხელება, სჯობს, თავიდანვე მივმართოთ ექიმს. მით უმეტეს, თუ ბავშვი ნაკლებად კონტაქტურია, ძირითადად სძინავს, საკვებზე უარს ამბობს, სითხეს ვერ იღებს და ა.შ. იგივე ითქმის ხანდაზმულებზე. საფრთხილოა ქრონიკული დაავადებების მქონეები და ორსულები, რომლებმაც ჯობია, თავიდანვე გაიარონ კონსულტაცია ექიმთან და საჭიროების შემთხვევაში, მათი რჩევით, გაიარონ კვლევები და მიიღონ შესაბამისი მკურნალობა”– დასძენს ის.