2024 წლის 7 იანვარს საზოგადოებრივი მაუწყებლის სამეურვეო საბჭოს წევრმა ბონდო მძინარაშვილმა საკუთარ Facebook გვერდზე გამოაქვეყნა პოსტი, რომელიც სამების საკათედრო ტაძარში არსებულ წმინდა მატრონა მოსკოველისა და სტალინის ხატს ეხებოდა.
ბონდო მძინარაშვილის მტკიცებით, 1941 წელს სტალინი მართლაც შეხვდა მატრონა მოსკოველს და მისი რჩევით ღვთისმშობლის ხატი ფრონტის ხაზზე გაიტანეს, რამაც სსრკ ფაშისტებისგან დაიცვა.
ამავე საკითხზე მედია-კავშირმა “ობიექტივმა” გააზიარა “პატრიოტთა ალიანსის” ლიდერის ირმა ინაშვილის ვიდეო, სადაც ის ასევე საუბრობს სტალინისა და მატრონას შეხვედრაზე და ამატებს, რომ ხატებზე უარყოფითი ფიგურების გამოსახვა ჩვეულებრივი მოვლენაა.
„მითების დეტექტორი“ სტალინისა და წმ. მატრონას შეხვედრის საკითხეს ეხმაურება და მას ლეგენდას უწოდებს.
„სტალინისა და წმინდა მატრონას შეხვედრა ისტორიულად არ დასტურდება და ის მხოლოდ ლეგენდაა. ამას ადასტურებს ასევე არქიმანდრიტი იობ გუმეროვი, რომელსაც წმინდა მატრონას ისტორიის მოძიება დაავალეს, რათა ის შემდგომში წმინდანად შეერაცხათ. წმინდა მატრონას ხატი სტალინის გამოსახულებით 2008 წელს ი. ი. პივნიკის მიერ დაიწერა. ხატის გამოყენებას სანქტ-პეტერბურგში, წმ. მოციქულთასწორი ოლღას სახელობის ტაძარში, ხალხის და მედიის მხრიდან პროტესტი მოჰყვა. სანქტ-პეტერბურგის ეპარქიის განცხადებით ხატი მხოლოდ ლეგენდას ეყრდნობოდა. ტაძრის ხელმძღვანელმა ხატის გარშემო ატეხილ ამბავში მედია დაადანაშაულა და ლოცვის მერე ხატი მოსკოვში გაგზავნა, რათა სკანდალი დასრულებულიყო და ხატი “ლიბერალ ექსტრემისტებს” აღარ შეელახათ…“ კითხვა განაგრძეთ ბმულზე.