გუშინ მწერალმა ლაშა ბუღაძემ გამოაქვეყნა პოსტი, სადაც წერდა „გილოცავთ რუსულ შობას“.
ამას დღეს „ქართული ოცნების“ თავმჯდომარემ, ირაკლი კობახიძემ უპასუხა: „ფსევდოლიბერალი ნაციონალების ერთ-ერთმა საყვარელმა მწერალმა ქართულ შობას, რომელიც სამოქალაქო კალენდრით 7 იანვარს, იულიანური კალენდრით კი – 25 დეკემბერს აღინიშნება, რუსული შობა უწოდა“.
კობახიძეს სოციალური ქსელით გამოეხმაურა ბუღაძე.
„იმის მაგივრად, რომ სამებაში გამოდებული სტალინის რუსული ხატი დაგმოს, ჩემს ირონიულ რეპლიკაზე ბოდავს რაღაცას…
დიახ, “7 იანვარი” დღეს პოლიტიკური თარიღია და არა რელიგიური.
პოლიტიკური რომ არ იყოს, არც უკრაინის ეკლესია დაიწყებდა შობის აღნიშვნას 25 დეკემბერს და არც ყველაზე დიდი ქართველი პატრიარქი, წმინდა ამბროსი ხელაია ცდიდა 25 დეკემბრის ტრადიციის აღდგენას!
იქ, სადაც რელიგიაა, ცხადია დავა აბსურდულიც კია – გნებავთ, იულიუს კეისრის კალენდრის მიხედვით (7 იანვარი) აღნიშნეთ შობა და გნებავთ, პაპ გრიგორიუსის (25 დეკემბერი), მაგრამ აბსურდული არაა საფრთხე, რომელიც რუსეთზე ბმულობას გულისხმობს…
ამბროსი ხელაიას გადაწყვეტილება რუსეთისგან დისტანცირების ნაბიჯია… 25 დეკემბერი რუსეთისგან დაშორების და ევროპულ-ცივილიზაციურ დროსთან დაახლოების სიმბოლური აქტია!
მაგრამ თქვენ გირჩევნიათ სტალინის ხატები გედგათ სამების ტაძარში და ვინც კი ანტირუსულობისა და ეროვნულობისკენ მოგიწოდებთ, “მტრის ხატებად” შერაცხოთ…“, – წერს ის.