დაშავებულ ძაღლს, რომელიც ბაღდათიდან თბილისში, კლინიკა “ვეტმედში” გადმოიყვანეს, ოპერაცია ჩაუტარდა. თავის ტვინიდან მას ჰემატომა ამოუღეს, დამტვრეული აქვს ქალის ძვლები. მიუსაფარი ცხოველი ექიმების მეთვალყურეობის ქვეშ რჩება.
როგორც ქირურგის ასისტენტი ჟურნალისტებთან აცხადებს, მიუსაფარი ცხოველი ნარკოზიდან გამოვიდა, თუმცა საყურადღებო იქნება შემდგომი პერიოდი.
“ვიეჭვეთ, რომ ეს არის დაზიანებული ხელოვნურად – ეს არ ჰგავს თავში რაღაცის დაცემას, უფრო მეტად ჩარტყმულია. ტვინს მოშორდა კომპრესია, ცხოველი გამოფხიზლდა, გამოვიდა ნარკოზიდან, ეს უკვე ძალიან კარგი ამბავია, თუმცა ვნახოთ შემდეგი პერიოდი როგორი იქნება”, – განაცხადა მან.
თავდაპირველად სოციალურ ქსელში გავრცელდა ინფორმაცია, რომ მიუსაფარ ცხოველს პირში ასაფეთქებელი აუფეთქეს, რაც მოგვიანებით არ დადასტურდა. ექიმების თქმით, ცხოველს დაზიანება ბლაგვი საგნით აქვს მიყენებული.
ბაღდათის მცხოვრები, ფიქრია მოდებაძე იხსენებს, რომ ძაღლის ტირილი და წკმუტუნი გაიგონა, ადგილზე კი დასისხლიანებული ცხოველი დახვდა. მისი თქმით, ჯერ 112-ში დარეკა, თუმცა უწყებამ ადგილობრივ თვითმმართველობასთან გადაამისამართა, დახმარება უწყებიდან ვერ მიიღო, რადგან მისი თქმით, დასვენების დღე იყო და რაიონიდან ყველა გასული აღმოჩნდა.
მომხდარზე გამოძიება სისხლის სამართლის კოდექსის 259-ე მუხლით მიმდინარეობს, რაც გულისხმობს ცხოველის წამება, მისდამი სასტიკი მოპყრობა ან სხვაგვარი ძალადობა.
წყარო: infoimereti.ge