თბილისის ცენტრში, მეტროსადგურ “რუსთაველში”, ესკალატორებს შორის რამდენიმე დღეა დააყენეს მანათობლები, რომლებიდანაც მუსიკა ისმის. სწორედ აქ, დედაქალაქის ერთ-ერთ ყველაზე ძველ მეტროსადგურში, რამდენიმე წლის წინ მოხსნეს სანათები, რომლებიც ესკალატორების გამყოფ პანელზე საბჭოთა დროიდან იდგა.
რადიო თავისუფლებამ გაარკვია, რომ ახალი სანათები დააყენეს დროებით, რამდენიმე თვით. მუსიკალურ სანათებს, რომლებიც იმავე სივრციდან წლების წინ მოხსნილ ძველ მანათობლებს ჰგავს, რკინის სფეროს ფორმა აქვს. ისინი დამზადდა მერიას დაქვემდებარებული “თბილისის საჯარო ხელოვნების ფონდის” სახსრებით.
კონკურსის ბიუჯეტი 20 ათასი ლარი იყო.
“მიზნად დავისახეთ თანამედროვე ხელოვნება გამოგვეტანა მუზეუმის ჩარჩოდან საჯარო სივრცეში… ეს პრინციპი ფართოდ აპრობირებულია და მეტად საინტერესო საერთაშორისო მაგალითებზე დაყრდნობით შევიმუშავეთ… ასიათასობით ადამიანი ხდება გამოფენის უნებლიე დამთვალიერებელი”, – უთხრა ფონდის დირექტორმა ლიკა ჭკუასელმა რადიო თავისუფლებას.