თბილისის ზოოპარკის დირექტორი, ზურაბ გურიელიძე, ზოოპარკთან მცხოვრებლებს მოუწოდებს, პიროტექნიკა არ გამოიყენონ.
„პიროტექნიკის გამოყენება რთულ შედეგებს იწვევს ხოლმე ცხოველებისათვის. ლაპარაკია როგორც ზოოპარკის ცხოველებზე, ისე მათზე, რომლებიც არიან ჩვენ გარშემო. მოულოდნელი ხმაური, რომელსაც თან განათება მოჰყვება, ცხოველებისთვის გაუგებარი და აუხსნელია, შესაბამისად, დიდი საფრთხის შემცველია მათთვის… ზოგ შემთხვევაში ისინი არიან დამალულები, ზოგ შემთხვევაში იწყებენ სირბილს ყოველგვარი გარკვეული მიმართულების გარეშე. ეს განსაკუთრებით სახიფათოა ისეთი ცხოველებისთვის, როგორებიც არიან ჩლიქოსნები. ისინი დიდი ზომის ცხოველები არიან და დიდი წონაც აქვთ. ხშირ შემთხვევაში, სწორედ ასე ხდება ხოლმე ცხოველების დაზიანება და შეიძლება დაღუპვაც“, – აღნიშნავს ის.