ძაღლის გამო დაწყებული კონფლიქტი სროლაში გადაიზარდა – თბილისში, ჟვანიას ქუჩაზე საბავშვო ბაღთან უცხო ქვეყნის მოქალაქე, მშობელი დაჭრეს. დანაშაულზე დაკავებულია ბიზნესმენ თამაზ ელიზბარაშვილის შვილი, გურამ ელიზბარაშვილი.
მამა ამტკიცებს, რომ მისი ვაჟიც ორმხრივი სროლის დროს ფეხში დაიჭრა, თუმცა საიდან ჰქონდა მას იარაღი არ საუბრობს.
ჟვანიას ქუჩაზე მოქალაქეებმა რამდენიმე გასროლის ხმა დილით გაიგონეს. ეს ის დროა, როდესაც მშობლებს შვილები საბავშვო ბაღში მიჰყავთ. წინასწარი ინფორმაციით, მამამ ბავშვი სააღმზრდელო დაწესებულებაში დატოვა, იქიდან გამოსულს კი კონფლიქტი გურამ ელიზბარაშვილთან მოუვიდა, რომელიც ძაღლს ასეირნებდა. ელიზბარაშვილს ხელბორკილები უკვე დაადეს და ის ახლა ბრალის წარდგენას ელოდება.