“მე პირადად გავიკეთებ კორონავირუსის საწინააღმდეგო ვაქცინას, მაგალითის მიცემის სახით”, – ამის შესახებ გურჯაანისა და ველისციხის მთავარეპისკოპოსმა, მეუფე ექვთიმემ ტელეკომპანია “გურჯაანთან” სატელეფონო საუბარში განაცხადა.
მეუფე ექვთიმე აცხადებს, რომ ვაქცინებმა კაცობრიობას ძალიან დიდი შვება მისცეს და მათი დახმარებით ცივილიზებულ სამყაროში, სხვადასხვა ვირუსული დაავადება ისტორიას ჩაბარდა.
“ვაქცინებმა კაცობრიობას ძალიან დიდი შვება მისცეს, იმიტომ, რომ წინა საუკუნეში სხვადასხვა ვირუსული დაავადება ისტორიას ჩაბარდა ცივილიზებულ სამყაროში. ასე, რომ ძალიან მნიშვნელოვანი ფაქტორია, ეს მედიცინის განვითარების ერთ-ერთი ეტაპია. ჩვენ ხომ ვსარგებლობთ მედიცინის მომსახურებით, ექიმებთან ხომ დავდივართ?! ასე, რომ არანაირი პრობლემა არ არის ვაქცინაც, ვისაც უნდა.
ადრე, საბჭოთა კავშირში, გარკვეული იძულებითი წესი იყო, ბავშვებს, ყველას ცრიდნენ სხვადასხვა დაავადებაზე და ამით იცავდნენ მოსახლეობას, მაგრამ ახლა, დღეს, ვისაც უნდა გაიკეთებს, ვისაც არ უნდა – არ გაიკეთებს, არავინ არავის აძალებს…
მე, პირადად, ალბათ, გავიკეთებ, თუ ეს საჭიროა იმისთვის, რომ მაგალითის სახით ან რაღაც ასე, დაახლოებით. რა არის პრობლემა?! მესმის ახლა, ვაქცინასთან დაკავშირებით რაღაც აზრთა სხვაობა არის… მაგრამ მეორე მხრივ, ეს ხომ საკმაო სამუშაოს შედეგია, გამოცდის შედეგად და ა.შ. ყოველი წამალი რაღაც გარკვეულ უკუჩვენებებს ყოველთვის იძლევა, მაგრამ ეს ხომ არ არის საბაბი, რომ ადამიანმა არ მიიღოს, როცა სჭირდება”, – განაცხადა მთავარეპისკოპოსმა ექვთიმემ ტელეკომპანია “გურჯაანთან” სატელეფონო საუბარში.