ტრავმატოლოგ-ორთოპედი ლევან ჩიტაია გადაცემაში “პირადი ექიმი” საუბრობს, რომელია ყველაზე გავრცელებული შეცდომა, როდესაც ბავშვი ტრავმას იღებს:
– ასეთ პრობლემებს ძალიან ხშირად ვაწყდებით – პაციენტი რომ ტრავმას მიიღებს და ვხედავთ, კლინიკურად დეფორმაციაა, არის შემთხვევები, როდესაც გაუაზრებლად მშობელი ბავშვს “ეცემა” და გასწორებას დაუწყებს. მსგავსი ქმედება კატეგორიულად არ შეიძლება. ასევე, არის შემთხვევები, როდესაც საყვარელი ბებიების რჩევებს ითვალისწინებენ და ჭრილობას სპირტით, არყით დაუზელენ. ეს დაუშვებელია იმიტომ, რომ ჯერ არც ვიცით, ჭრილობის შიგნით ძვლოვანი სტრუქტურა დარღვეულია, თუ არა. მოგეხსენებათ, ნებისმიერი მოტეხილობის დროს, რბილ ქსოვილებში სისხლი იღვრება. ჩვენ ამ დაზელვით, გახურებით შეიძლება, მდგომარეობა კიდევ უფრო გავაღრმაოთ. გარდა ამისა, ტრავმის შემდეგ შეგვხვედრია კვერცხს, მარილს, ფქვილსა და ტალახს ზელენ და ამით უფიქსირებენ. ესეც არ შეიძლება. ასეთი აქტივობები, განსაკუთრებით რეგიონებში ხდება. რომ ჩამოდიან და კირივით მასას ვაცლით, ხშირად დამწვრობებიცაა. როდესაც ბავშვი ტრავმას იღებს, პირველ რიგში, არაფრით შეიძლება, გაუბრაზდე იმის გამო, რომ ტრავმა მიიღო – ანუ, პირველი, ვეფერებით. მშობელმაც აუცილებლად უნდა შეინარჩუნოს წონასწორობა. როდესაც მშობელი აღელვებულია, ის ფსიქოემოციური მდგომარეობა ბავშვზეც გადმოდის.