ორგანიზაციამ „საერთაშორისო გამჭვირვალობა – საქართველო“ 2024 წლის სახელმწიფო ბიუჯეტის პროექტთან დაკავშირებით ანალიზი გამოაქვეყნა.
„ადმინისტრაციული ხარჯები, რომლებიც საჯარო სექტორის შრომის ანაზღაურებას და საქონლის და მომსახურების შესყიდვას მოიცავს, 367 მლნ ლარით იზრდება. შრომის ანაზღაურებაზე 2.5 მლრდ ლარი (ზრდა 282 მლნ) დაიხარჯება, ხოლო საქონლის და მომსახურების შესყიდვაზე 2.2 მლრდ ლარი (ზრდა 85 მლნ). საჯარო სექტორში დასაქმებულთა თანამდებობრივი სარგო 10%-ით იზრდება და თვეში მინიმუმ 1 330 ლარი იქნება.
საჯარო სექტორში დასაქმებულთა რაოდენობა 303-ით იზრდება, რაც ასევე განაპირობებს შრომის ანაზღაურებაზე გამოყოფილი თანხის მატებას. ყველაზე მეტად შინაგან საქმეთა სამინისტროს სისტემაში დასაქმებულთა რაოდენობა იზრდება – 130-ით. 86 ადამიანი იქნება დასაქმებული 2023 წელს შექმნილ ახალ სსიპ-ში „ანტიკორუფციული ბიუროში“. 49-ით იზრდება სსიპ „ვეტერანების საქმეთა სახელმწიფო სამსახურში“ დასაქმებულთა რაოდენობა, 28-ით ეკონომიკის სამინისტროში დასაქმებულთა რაოდენობა,“- აღნიშნულია ორგანიზაციის მიერ გამოქვეყნებულ დოკუმენტში.