🎥 „დღეს რომ მკითხოთ, ვინ არის შენი კერპი მუსიკასა და ადამიანობაში, ერთი წუთითაც არ დავფიქრდები – რევაზ ლაღიძე“

დღეს ლეგენდარული ქართველი კომპოზიტორის, რევაზ ლაღიძის გარდაცვალების დღეა.

„1 არხი“ რევაზ ლაღიძის შესახებ მის შვილსა და მეგობრებს ესაუბრა.

რევაზ ლაღიძე სხვადასხვა ჟანრის მუსიკალური ნაწარმოებების ავტორია.

მას ეკუთვნის ოპერა „ლელა“ (1973), მუსიკალური კომედიები „მეგობრები“ (1951) და „კომბლე“ (1957), სიმფონიური პოემა „სამშობლოსათვის“ (1949), სიმფონიური სურათი „საჭიდაო“ (1952), რამდენიმე საგუნდო სიმღერა-კანტატა („სიმღერა სამშობლოზე“, „ბალადა ვაზზე“, „ოდა მესხეთზე“, „მოხეური ბალადა“ და სხვა), საფორტეპიანო („ტოკატა“ და სხვა) და ჩელოს („პოემა“, „ელეგია“ და სხვა) პიესები, ერთნაწილიანი კანტატა „მელის ვარძია“ შერეული გუნდისა და ორკესტრისათვის (1966, ირაკლი აბაშიძის ლექსზე ციკლიდან „რუსთაველის ნაკვალევზე“), მუსიკა სპექტაკლებისა (გენო ქელბაქიანის „ახალგაზრდა მასწავლებელი“, ლეო ქიაჩელის „ტარიელ გოლუა“ და სხვა სულ 40-ზე მეტი) და კინოფილმებისათვის („საბუდარელი ჭაბუკი“, „ნინო“, „ზვიგენის კბილი“, „ხევისბერი გოჩა“ და სხვა. სულ 30-ზე მეტი).

ის 1981 წლის 16 ოქტომბერს, 60 წლის ასაკში, გარდაიცვალა. დაკრძალულია დიდუბის პანთეონში.