კულტურის, სპორტისა და ახალგაზრდობის სამინისტრო სამწუხარო ინფორმაციას ავრცელებს

კულტურის, სპორტისა და ახალგაზრდობის სამინისტრო სამწუხარო ინფორმაციას ავრცელებს:

“კულტურის სამინისტრო მწუხარებას გამოთქვამს ქართველი მომღერლის, ინგა ფერაძის, გარდაცვალების გამო
ქართველი მომღერალი ინგა ფერაძე 76 წლის ასაკში გარდაიცვალა.
ინგა ფერაძემ 1970-იან წლებში დაიწყო აქტიური შემოქმედებითი მოღვაწეობა – იყო ერთ-ერთი ყველაზე ცნობილი ჯაზის მომღერალი ქალი საბჭოთა კავშირის მასშტაბით; მღეროდა ანსამბლში „ორერა“, ოთხი წლის განმავლობაში, ანსამბლ „დიელოს“ უცვლელი სოლისტი იყო. 1980-იან წლებში მღეროდა ქალაქურ სიმღერებს.
მომღერალი წარმატებულად მართავდა კონცერტებს როგორც ყოფილი საბჭოთა კავშირის ტერიტორიაზე, ასევე მის ფარგლებს გარეთ.
აღსანიშნავია, რომ ინგა ფერაძის შემოქმედებითი საქმიანობა უკავშირდებოდა ცნობილ ჯაზმენს, იგორ ბრილს. სწორედ მასთან მუშაობის პერიოდში აღიარეს ინგა ფერაძე ჯაზის საუკეთესო შემსრულებლად.
ბალტიისპირეთის ქვეყნების ფესტივალებზე მან ასევე მიიღო ლაურეატის წოდება, როგორც ჯაზის საუკეთესო ქალმა შემსრულებელმა.
2001 წელს, ჯანმრთელობის მდგომარეობის გაუარესების გამო, ინგა ფერაძე გაემგზავრა ბელგიაში, სადაც ცხოვრების ბოლო წლები გაატარა.
საქართველოს კულტურის, სპორტისა და ახალგაზრდობის სამინისტრო უსამძიმრებს ინგა ფერაძის ოჯახს, ახლობლებსა და მეგობრებს”