ბელგიაში მცხოვრები ქართველი მომღერალი ინგა ფერაძე 9 ოქტომბერს გარდაიცვალა. ფერაძე ოთხი წლის განმავლობაში ანსამბლ „დიელოს“ უცვლელი წევრი იყო. 70-იან წლებში იყო ერთ-ერთი ყველაზე ცნობილი ჯაზის მომღერალი ქალი საბჭოთა კავშირის მასშტაბით. 80-იან წლებში მღეროდა ქალაქურ სიმღერებს. ცხოვრების ბოლო წლები ბელგიაში, სამშობლოსგან შორს, დაბრუნების იმედით გაატარა.
მისი ბედი სავსე იყო დრამატული მოვლენებით. სამწუხაროდ, არ გაუმართლა პირად ცხოვრებაშიც. მე-17 დაბადების დღის აღნიშვნისას მომხდარი ჩხუბის გამო დააპატიმრეს და ადამიანის დაჭრისთვის გაასამართლეს, თუმცა, როგორც თავად ამბობს, უდანაშაულო იყო. მიუხედავად ამისა, ციხეს ემადლიერება და ამბობს, რომ რეალური ცხოვრება იქ ისწავლა. განვლილი ცხოვრების გზასთან დაკავშირებით, ერთ-ერთ ინტერვუში იხსენებს: „სანამ ციხეში მოვხვდებოდი, მიამიტი, რომანტიკული გოგო ვიყავი. ფაქტობრივად, ციხეში ვისწავლე ცხოვრება. იქ რომ მეგობრობა იციან და დამოკიდებულებებში სისუფთავე, აქ ისეთი არ არის. დიდი ბიბლიოთეკა იყო და უამრავი წიგნი წავიკითხე. ღვთის სიტყვაც იქ ვისწავლე, ბიბლიას გავეცანი. ციხის მერე კინოსამსახიობო სასწავლებელშიც ჩავაბარე.
სანამ დამიჭერდნენ, სუხიშვილების ანსამბლის ფილიალში ვცეკვავდი, ვუკრავდი კიდეც, მაგრამ არ ვმღეროდი. სიმღერაც ციხეში დავიწყე და მას მერე აღარც გავჩერებულვარ.
სამშობლოდან შორს ყოფნა ძალიან მიჭირს. ვგრძნობ, რომ ფიზიკურად ვარ უცხოეთში, თორემ გული თბილისში მაქვს დატოვებული. ბრიუსელში მოწესრიგებული ცხოვრებაა, მაგრამ მე ჩემი ქოთქოთა თბილისი მენატრება. მტკივა მისი ტკივილი და მიხარია მისი სიხარული. ვერც კი წარმოიდგენთ, როგორ მიყვარს ყველა ქართველი. თბილისის მენტალიტეტი სულ სხვაა. მტკვრის ჩურჩული მენატრება. მთელი ჩემი შემოქმედება საქართველოს ეძღვნება. ყველაზე გულიანად აქ მემღერება.”
სამწუხაროდ, სიცოცხლეში საქართველოში დაბრუნება ვერ მოახერხა, მეგობრები, კოლეგები თუ უბრალოდ მისი გულშემატკივრები უკანასკნელ გზაზე თბილი სიტყვებით შორიდან აცილებენ.
წყარო:მარაო
