ბულგარული წიწაკა ფასდაუდებელი ბოსტნეულია თავისი მდიდარი შემადგენლობით. ეს არაჩვეულებრივი ბუნებრივი „პოლივიტამინური“ პრეპარატი ბუნებამ შექმნა.
მასში შემავალი ნივთიერებები ხელს უშლიან ანემიის განვითარებას, აძლიერებენ იმუნიტეტს, ხოლო ვიტამინების მრავალფეროვნება ხელს უწყობს სისხლძარღვთა გამაგრებას და ზრდის მათ ელასტიკურობას. ასტიმულირებს თმის ზრდას, აუმჯობესებს კანისა და მისი დანამატების სტრუქტურას. განაპირობებს ძვლოვანი ქსოვილის განმტკიცებას და განახლებას. ხელს უწყობს მხედველობის შენარჩუნებას, ასევე, დეპრესიული მდგომარეობიდან თავის დაღწევას. განსაკუთრებით სასარგებლოა შაქრიანი დიაბეტით დაავადებულთათვის. ბულგარული წიწაკა, ასევე, არის მადის აღმძვრელი საშუალება. ძალზე სასარგებლოა მათთვის, ვინც გონებრივ შრომას ეწევა. როგორც მამაკაცის, ასევე ქალის ორგანიზმს უნარჩუნებს ახალგაზრდობას და ჯანმრთელობას. გაციების დროს შეიძლება გამოვიყენოთ, როგორც პროფილაქტიკური საშუალება.
წიწაკაში შემავალი ყველა სასარგებლო ნივთიერება თავმოყრილია ნაყოფის ყუნწში, მის შიდა, მოთეთრო რბილობსა და თესლში, ეს კი ის ნაწილებია, რომლებსაც ჩვენ, პრაქტიკულად, ყოველთვის ვყრით. კარგი იქნება, თუ მთელ წიწაკას ან მთლიანი ნაყოფისგან გამოწურულ წვენს მიირთმევთ. ნურც ის დაგავიწყდებათ, რომ თერმული დამუშავების დროს ბოსტნეულის უმრავლესობა სასარგებლო ნივთიერებათა 70%-ს კარგავს, მაგრამ აღსანიშნავია, რომ თერმული დამუშავების შედეგად ბულგარულ წიწაკაში სასარგებლო ნივთიერებების დიდი ნაწილი არ ნადგურდება.
ერთი ცალი ბულგარული წიწაკა შეიცავს C ვიტამინის სადღეღამისო ნორმას და ამ ვიტამინის შემცველობის წყალობით, ბევრ სხვა ბოსტნეულსაც უსწრებს.
C ვიტამინით ორგანიზმის მომარაგება აუცილებელია, რათა ადვილად გაუმკლავდეთ ვირუსებს და სხვადასხვა რესპირატორულ დაავადებებს. ამიტომ, ეცადეთ, რაც შეიძლება, ხშირად ჭამოთ ბულგარული წიწაკა და ამით შეივსოთ თქვენი ორგანიზმი C ვიტამინით.
სასურველია, ტკბილი წიწაკა ცხიმთან ერთად მიირთვათ, რათა ორგანიზმმა მაქსიმალურად შეითვისოს მასში არსებული ვიტამინები. ასე რომ, კარგი იქნება, თუ მას მცენარეულ ზეთში მოშუშავთ და ისე შეჭამთ.
საერთოდ, ბულგარული წიწაკა თავისი შემცველობით უნიკალური პროდუქტია. მასში შედის ვიტამინები, მინერალური ნივთიერებები – კალიუმი, კალციუმი, ნატრიუმი, ფოსფორი, მაგნიუმი, ქლორი, რკინა, ფთორი, თუთია, იოდი; ის შეიცავს უჯრედისს, ცილებს, ნახშირწყლებს, ალკალოიდებს და სხვა.
ბულგარული წიწაკის გამოყენება რეკომენდებულია სახსრების ტკივილისა და მაღალი ქოლესტერინის დროს.
ვიტამინ B6 -ისა და ფოლიუმის მჟავის დიდი შემცველობის წყალობით, მცენარე აბრკოლებს იშემიური დაავადებების განვითარებას.
ბულგარული წიწაკა რეკომენდებულია მწეველებისთვისაც – ის ტოქსინებისგან წმენდს ფილტვებს და იცავს პათოლოგიური ცვლილებებისგან. სასუნთქი გზების ენფიზემის დროს მის მიღებას ყოველდღიურად ურჩევენ.
ბულგარული წიწაკა, რომელიც თავისი უნიკალური თვისებებით სტაფილოს უთანაბრდება, ასევე ცნობილია სასარგებლო თვისებებით ფრჩხილებისა და თმის ზრდისა და გამაგრებისთვის. ის მოქმედებს მხედველობაზე და კანის რეგენერაციაზე.
წყარო: თბილისელები
