მინიმალური ხელფასის ოდენობა საქართველოში საბაზრო ურთიერთობათა პირობებში შრომის ანაზღაურების სახელმწიფო რეგულირების, დაქირავებულ მუშაკთა სოციალური დაცვის მიზნით და „საქართველოს 1999 წლის სახელმწიფო ბიუჯეტის შესახებ“ კანონის შესაბამისად 1999 წელს 20 ლარით განისაზღვრა და მას შემდეგ არ შევლილა.
აღსანიშნავია, რომ საქართველოში საარსებო მინიმუმი მიმდინარე წლის აგვისტოში 253.5 ლარით განისაზღვრა, რაც 233.5 ლარით აღემატება საქართველოში არსებულ მინიმალურ ხელფასს. შესაბამისად 20 ლარით ადამიანი საკუთარი თავის გამოკვებსაც კი ვერ მოახერხებს, არა თუ სხვა მოთხოვნილებების დაკმაყოფილებას. ცნობისთვის, საარსებო მინიმუმი საქართველოში მინიმალური სასურსათო კალათის საფუძველზე დგინდება.
როგორც სპეციალისტები ამბობენ საარსებო მინიმუმი მსოფლიოში არის ის მინიმუმი, რომელიც აუცილებელია ადამიანისთვის ღისეული ცხოვრებისათვის, საქართველოში კი იგი გათვლილია მხოლოდ ადამიანის არსებობისათვის. მათივე განმარტებით საქართველოში საარსებო მინიმუმის გაანგარიშებისას, მიღებული თანხის 70 % შეადგენს სასურსათო კალათის ღირებულებას, და მხოლოდ 30%-ია სხვა ხარჯებისთვის გამოყოფილი, მაშინ, როცა ევროპული ქვეყნების უმეტესობისთვის საარსებო მინიმუმში სასურსათო კალათას მინიმალური წილი უჭირავს. საქართველოში საარსებო მინიმუმში, არ არის გათვალისწინებული და ცალკე გამოყოფილი, ხარჯები კულტურაზე, განათლებაზე, კომუნალურ გადასახადებზე, მედიცინასა და მედიკამენტებზე.
24 წლის შემდეგ, პროფკავშირები კვლავ, უკვე მესამედ ითხოვს დაწესდეს მინიმალური ხელფასის სტანდარტი, საშუალო ხელფასის 40% – 636 ლარი. სტატისტიკის ეროვნული სამსახურის მონაცემებით, 2023 წლის მეორე კვარტალში საქართველოში საშუალო თვიური ნომინალური ხელფასი 1 804.5 ლარს შეადგნს, რაც გასული წლის შესაბამის პერიოდთან შედარებით 17.1 პროცენტით, ანუ 263.2 ლარითაა გაზრდილი. თუ პროფკავშირის ინიციატივა დამტკიცდება ამ მონაცემებით მინიმალური ხელფასი ქვეყანაში უნდა იყოს – 721,8 ლარი.
“საქართველოს პროფკავშირების გაერთიანება 6 ოქტომბერს, 12:00 საათზე, პარლამენტში ღირსეული მინიმალური ხელფასის დაწესების შესახებ ინიციატივას შეიტანს. საკანონმდებლო ორგანოს უკანა შესასვლელთან აქტივისტები შეიკრიბებიან.
საქართველოს პროფკავშირების გაერთიანება ითხოვს დაწესდეს ღირსეული მინიმალური ხელფასის სტანდარტი, საქსტატის მიერ გამოანგარიშებული საშუალო ხელფასის 40%-ის ოდენობით. რაც დღეის მდგომარეობით 636 ლარს შეადგენს.
საქართველოში 636 ლარზე ნაკლები ხელფასი 190,000 ადამიანზე მეტს აქვს. რაც იმას ნიშნავს, რომ ინიციატივის დამტკიცების შემთხვევაში, მინიმუმ ამ ოდენობის ადამიანს გაუუმჯობესდება ყოველდღიური ყოფა.
პროფკავშირების გაერთიანების თავმჯდომარე, ირაკლი პეტრიაშვილი განცხადებას გააკეთებს და ინიციატივას დაარეგისტრირებს.” – ნათქვამია პროფკავშირების მიერ გავრცელებულ ინფორმაციაში.
წყარო: „მეგა ტვ“
