საჯარო სამსახურში სტაჟირება ანაზღაურებადი ხდება. ეს ანაზღაურება კონკრეტული საჯარო მოხელის ანაზღაურებასთან იქნება გათანაბრებული.
“საჯარო სამსახურის შესახებ” კანონში დაგეგმილი ცვლილება პარლამენტის იურიდიულ საკითხთა კომიტეტს “ქართული ოცნების” დეპუტატმა გივი მიქანაძემ გააცნო.
როგორც მიქანაძემ განმარტა, გასულ წელს “საჯარო სამსახურის შესახებ” კანონში განხორციელებული ცვლილებებით სტაჟირება სტაჟში არის ჩათვლილი, თუმცა მაშინ ვერ მოხერხდა შეთანხმება იმასთან დაკავშირებით, რომ სტაჟირება ყოფილიყო ანაზღაურებადი.
“ჩვენ გავაგრძელეთ კონსულტაციები შესაბამის სამინისტროებთან, მათ შორის, მთავრობის კანცელარიასთან, ფინანსთა სამინისტროსთან, სხვადასხვა უწყებებთან და მივაღწიეთ ერთიან პოზიციას, სრულ თანხმობას იმასთან დაკავშირებით, რომ კანონში შეტანილი იქნას ცვლილება, რომლითაც ყველა სტაჟიორი შესაბამის ანაზღაურებას მიიღებს.
ეს ანაზღაურება გათანაბრებულია კონკრეტული საჯარო მოხელის ანაზღაურებასთან. კონკრეტულად, საუბარია საჯარო დაწესებულების მე-3 კატეგორიის უმცროსი სპეციალისტის თანამდებობისთვის დადგენილი პირველი სახელფასო კოეფიციენტზე, რაც დაახლოებით 400-500 ლარს შეადგენს. თუმცა, ვითვალისწინებთ რა, რომ ჩვენ გვაქვს კანონი დეფიციტური პროფესიების შესახებ, ამ მიმართულებით, თუკი ამ პროფესიის პირი შესაბამისი მიმართულებით იქნა სტაჟირებაზე აყვანილი, უწყებას შესაძლებლობა აქვს, რომ მას დაუნიშნოს საჯარო დაწესებულების მე-2 კატეგორიის უფროსი სპეციალისტისთვის თანამდებობისთვის დადგენილი მე-2 სახელფასო კოეფიციენტის შესაბამისი ოდენობა, რაც დაახლოებით 1000 ლარს შეადგენს“, – განაცხადა გივი მიქანაძემ.
კანონის მიღების შემთხვევაში, ცვლილება ძალაში მომავალი წლის 1-ელი იანვრიდან შევა.
კანონპროექტის ინიციატორია ფრაქცია “ქართული ოცნება”.
წყარო: “ინტერპრესნიუსი”