იმერეთის ერთ-ერთ საჯარო სკოლაში მოსწავლე გოგონა თანაკლასელის მხრიდან ბულინგისა და შანტაჟის მსხვერპლი გახდა. შინაგან საქმეთა სამინისტრომ ფაქტზე გამოძიება დაიწყო.
არსებული ინფორმაციით, ბულინგის შემთხვევა არასრულწლოვნებს შორის სკოლაში მოხდა. საჯარო სკოლის მოსწავლეები თანატოლს თვითდაზიანებისკენ უბიძგებენ.
“მთავარ არხთან” პირველ კომენტარს აკეთებს გოგონას დედა:
“დილით ჩანთას რომ ალაგებდა და სკოლაში უნდა წასულიყო, უნახავს ფურცელი. იმ ტექსტით, რა ტექსტიც ალბათ ყველამ იცის და ნახეთ. ანუ მასწავლებლების შეცოდების გამო, ბავშვმა საღამომდე მოითმინა და დამიმალა ეს ფაქტი. საღამოს მოვდივარ, სამზარეულოში რაღაცას ვაკეთებ და შემოდის გათეთრებული აბსოლუტურად ბავშვი და მეუბნება, ნუ, ცრემლები თვალებზე აქვს და მეუბნება, დედა, ან სკოლიდან გადამიყვანე, ან მიშველე რამე და მაწვდის ფურცელს. გავხსენი ფურცელი და ვხედავ ამ საპარსს, რაღაც ბრიტვა, თუ არ ვიცი, ქართულად რაც ჰქვია, შემდეგი ტექსტით, ნუ, რაც იყო. შენ თუ ამას და ამას არ გააკეთებ, მოკლედ, ან შენ თვითონ დაიზიანებ თავს, ან მე თვითონ ჩაგახრჩობ სკოლის საპირფარეშოს უნიტაზში,” – ამბობს გოგონას დედა.