სახანძრო სამსახური, სასწრაფო დახმარების ბრიგადა, პოლიცია, გამნაღმველები და კინოლოგები. ამ შემადგენლობით მიმდინარეობდა დღეს მაღალაშვილის ქუჩიდან ერთი ოჯახის გამოსახლების სპეცოპერაცია. მამაკაცი კორპუსის აფეთქებით იმუქრებოდა. არსებობდა ინფორმაცია, რომ გიორგი ფიფია მონადირეა და არ იყო გამორიცხული მას სახლში საბრძოლო მასალები ჰქონოდა. ამიტომ პირველი სახლში კინოლოგები და გაწვრთნილი ძაღლები შევიდნენ.
ასაფეთქებელი ბინაში არ აღმოჩნდა, რის შემდეგაც 7 სულიანი ოჯახის გამოსახლებაც დაიწყო. სქემა უკვე კარგად ნაცნობია. ფიფიების ოჯახი თაღლითური გარიგების მსხვერპლი გახდა. ამ მაქინაციის უკან კი ყოფილი საჯარო მოხელე, თეთრიწყაროს მერის, ყოფილი მოადგილე ფიგურირებს. სწორედ დევი დევიძის მოთხოვნით მივიდა ადგილზე აღსრულების ბიურო. რამდენიმე საათიანი დაძაბული ვითარება საბოლოოდ გამოსახლებით დასრულდა, რაც იმას ნიშნავს, რომ კიდევ ერთი ოჯახი ელემენტარული თავშესაფრის გარეშე დარჩა.
დეტალები ნახეთ, ლიზა ლასარეიშვილის რეპორტაჟში.