“მეტრონომი” სეზონურ ვირუსებთან დაკავშირებით ცნობილ პედიატრს თემურ მიქელაძეს ესაუბრა. მან განმარტა რა არის საყურადღებო სიმპტომები და რა შემთხვევაში უნდა მიმართონ მშობლებმა ექიმს.
“ამ სეზონზე ის ვირუსები იჩენს თავს, რომლებიც ყოველ წელს იყო, ესენია რინოვირუსული და ადენო ვირუსული ინფექციები. ვირუსული ინფექციების სიხშირე იზრდება სოციალიზაციასთან ერთად. არდადეგების დასრულება, სკოლისა და ბაღების დაწყება მოქმედებს ვირუსული ინფექციების გავრცელების მასშტაბზე, თუმცა ეს არ არის უჩვეულო მოვლენა” – აღნიშნა მან.
რა სიმპტომების შემთხვევაში უნდა მიმართონ მშობლებმა ექიმს?
“მშობლებმა ექიმს უნდა მიმართონ მაღალი ცხელების დროს, როდესაც ცხელება არ ექვემდებარება სიცხის დამწევ საშუალებებს. ასევე თუ ბავშვი არის მივარდნილი, ვერ იღებს სითხეს, აქვს ღებინება და ნაწლავთა გახშირებული მოქმედება. პირველი ორი-სამი დღე ნებისმიერი ვირუსული ინფექციების მართვა შეიძლება ექიმთან სატელეფონო კომუნიკაციითაც კი თუ ვიცით რა არის დიაგნოზი. ვირუსული ინფექციები, როგორც წესი ორ- სამ დღეში თავისით გაივლის. ცალკე არის გრიპი, რომელსაც ველოდებით დაახლოებით ნოემბრისთვის, და ის გამოირჩევა შედარებით მწვავე მიმდინარეობით და ამიტომ შესაბამის რისკ ჯგუფებს უტარდებათ ვაქცინა” – განაცხადა პედიატრმა.
