გოგრა — ერთწლოვანი და მრავალწლოვანი მხოხავი მცენარის გვარი გოგრისებრთა ოჯახისა. გოგრა ბაღჩეული კულტურაა, აქვს მთავარღერძა მძლავრი ფესვთა სისტემა, დატოტვილი და მიწაზე გართხმული ან საყრდენზე ასული ღერო, გრძელყუნწიანი და ბუსუსიანი ფართო ფოთოლი, დიდი ყვითელი, ზარისებური ყვავილი.
გოგრა A ვიტამინის შემცველობით 5-ჯერ აღემატება სტაფილოს და 3-ჯერ – ძროხის ღვიძლს. A ვიტამინი კი განსაკუთრებით მნიშვნელოვანია ნორმალური მხედველობისათვის, ლორწოვანი მემბრანის (საჭმლის მომნელებელი ტრაქტის ამომფენი ქსოვილის რბილი შრე) შენარჩუნებისათვის, ბავშვის ზრდა-განვითარებისთვის – ხელს უწყობს ძვლების ზრდასა და გამაგრებას, იმუნური სისტემისთვის – ზრდის სასუნთქი გზების წინააღმდეგობის უნარს ინფექციების მიმართ და ზოგადად იდეალური დანამატია ნებისმიერი ადამიანის ჯანსაღი კვების რაციონისთვის.
გოგრა ძალიან სასარგებლო საკვებია პატარებისთვის: დიდი რაოდენობით შეიცავს ბავშვის ორგანიზმისთვის აუცილებელ ვიტამინებს (მათ შორის – A ვიტამინს, რის შესახებაც ზემოთ მოგახსენეთ), ცილებსა და უჯრედისს. ამ პროდუქტში შემავალი ვიტამინები ხელს უწყობს ბავშვის ზრდას, უზრუნველყოფს მშვიდ ძილს, პასუხს აგებს კანის და თვალების მდგომარეობაზე და აძლიერებს იმუნიტეტს.
რა შემთხვევაშია გოგრა საზიანო?
გოგრამ შესაძლოა ზიანი მოგიტანოთ თუ გაქვთ წყლული, გასტრიტი, ნაწლავის მიკროფლორის დარღვევა, ნაწლავური კოლიკები, დიარეა, კუჭის გაღიზიანება.
გოგრა უკუნაჩვენებია შაქრიანი დიაბეტით დაავადებულთათვის. ზოგ ადამიანს, შესაძლოა ასევე გოგრის აუტანლობაც ჰქონდეს, რამაც შესაძლოა ალერგიული რეაქცია და მოწამვლა გამოიწვიოს
