“ჯიუტია, ზარმაცი თუ საშინლად ცელქი? რასაც დღეს მოთმინებიდან გამოყავხართ, ხვალ თქვენს შვილებს წარმატებას და აღიარებას მოუტანს” – ცუდი თვისებების დადებითი მხარეები

“აუტანელი” თვისებები, რაც სინამდვილეში ჩვენი შვილების ძლიერი წარმატების მიღწევის საშუალებას მისცემს

მშობლები გამუდმებით ჩივიან შვილების მიუღებელ ქცევებზე. ზოგი მშობლისთვის ბავშვი ძალიან ცელქია, ზოგისთვის – ზედმეტად მოდუნებული, ზედმეტად აქტიური, მშიშარა ან პირიქით, ზედმეტად უშიშარი.

ნუ ღელავთ, ფსიქოლოგები გვაქრწმუნებენ, რომ ეს თვისებები, რომლებიც დღეს ასე გვაღიზიანებს, ათი წლის შემდეგ ჩვენი შვილების გამორჩეული ნიჭი და უპირატესობა გახდება, რაც წარმატებას მოუტანს.

რა უნდა გავაკეთოთ? დასაწყისისთვის, შთააგონეთ თავს, რომ ნებისმიერი აუტანელი თვისების მიღმა ნამდვილი ნიჭი იმალება. შემდეგ შეწყვიტეთ ბავშვის გაკიცხვა და დაიწყეთ მისი შთაგონება, რადგან თქვენი დახმარების გარეშე ის ამ ნიჭს საკუთარ თავში გაცილებით გვიან აღმოაჩენს.

სიჯიუტე
დიახ, ბავშვების სიჯიუტეს მართლაც მოთმინებიდან გამოვყავართ და იცით, რატომ? იმიტომ, რომ ეს ძალის გამოვლინებაა და ჩვენთვის ადვილი არ არის იმის აღიარება, რომ ჩვენი შვილი ძლიერია, შესაძლოა, ჩვენზე ძლიერიც კი და “გვჯობნის”.

სიჯიუტე ძვირფასი ნიჭია, ნამდვილი გამწევი ძალა, რომელსაც შეუძლია ნელ-ნელა და აუცილებლად მიიყვანოს თქვენი შვილი დასახული მიზნისკენ.

სიჯიუტე არის „არას“ თქმის, პირადი საზღვრების დაცვის უნარია და იმის მკაფიოდ ცოდნა, თუ რა გინდა. ასევე თავდაჯერება, რომ მიზანი მიღწევადია… ასე რომ, სიჯიუტე დიდი ძალაა და დააფასეთ.

შეუპოვრობა, პრინციპების დაცვა აუცილებელია მეცნიერებისთვის, გამომგონებლებისთვის, ყველა პროფესიის წარმომადგენლებისთვის. თანაც, დამეთანხმებით, ეს თვისებები მშობლებისთვისაც სანატრელია.

ჰიპერაქტიურობა
ყველაზე ხშირად, ბავშვი, რომელსაც „ჰიპერაქტიურად“ მოიხსენიებენ, ნამდვილად არ არის „ჰიპერი“, არამედ უბრალოდ აქტიური, დამოუკიდებელია, მრავალი ინტერესი აქვს, რომლებისთვისაც დღის ხანგრძლივობა არ ჰყოფნის. მომავალში აქტიურობა იქნება მისი მთავარი იარაღი, ყოველთვის სხვებზე მეტს მოასწრებს, დამატებითი საქმეებისთვისაც დარჩება დრო და დასასვენებლადაც. ეს უკვე წარმატების გასაღებია.

ჰიპერაქტიურობა საშუალებას მისცემს არ ჩავარდეს პანიკაში ექსტრემალური სიტუაციების გამო. დღევანდელი ჰიპერაქტიური ბავშვი ადვილად შეიტავსებს რამდენიმე პროფესიას, ადვილად გადაერთვება ერთი დავალებიდან მეორეზე და რაც მთავარია, ასეთი გრაფიკი მას ფსიქოლოგიურად არ დააზიანებს.

აქტიური ცხოვრების უნარი შეუცვლელია, მაგალითად, შოუმენებისთვის, პოლიტიკოსებისთვის, ტოპ მენეჯერებისთვის, ჟურნალისტებისთვის, ტელეპროდიუსერებისთვის.

ეშმაკობა
ჩვენს წინაშე არის ნათელი, გამჭრიახი გონება, რომელიც ლამაზ და საინტერესო გადაწყვეტილებებს ეძებს. ხშირად ასე ვლინდება კომერციული ნიჭი ბავშვში: როგორ დახარჯოს მინიმალური რესურსი დიდი შედეგის მისაღწევად? როგორ აიცილოს თავიდან ზედმეტი შრომა და მივიდეს გამარჯვებამდე? თუ თქვენი შვილი ასეთ გადაწყვეტილებებს იღებს სწავლაში, კომუნიკაციაში, გუნდურ თამაშებში, თქვენ და მას წარმოუდგენლად გაგიმართლათ. მთავარია ასწავლოთ, რომ ეს თვისება სხვების საზიანოდ არ უნდა გამოიყენოს.

ეშმაკური თვისებები გამოადგება ბიზნესში, მენეჯმენტში, მარკეტინგში, წარმოებაში და ყველა პროფესიაში, სადაც უნდა მიიღოთ სწრაფი გადაწყვეტილებები და გარკვეულ შედეგს მიაღწიოთ.

სიზარმაცე
ფსიქოლოგები ამბობენ, რომ სიზარმაცე არ არის იმდენად მანკიერი თვისება, რამდენადაც ენერგიის დაზოგვის ფორმა და იმ ქმედებების აცილება, რამაც შეიძლება თვითგანადგურებამდე მიიყვანოს ადამიანი. სიზარმაცით ბავშვი გადარჩენას ცდილობს, სასიცოცხლო ძალების ეკონომიას აკეთებს. იგონებს ათას გზას, რაც მიზანს ზედმეტი ძალისხმევის გარეშე მიაღწევინებს. ეს უნარი კრიტიკულ სიტუაციებში ყოველვის გამოადგება. გარდა ამისა, ის ფრთხილია, დაუფიქრებლად არ მოჰკიდებს საქმეს ხელს. კრიტიკულობა, წინდახედულობა, მოთმინების უნარი – ეს მომავლის მნიშვნელოვანი კომპეტენციაა.

რასაც დღეს სიზარმაცეს ეძახით, ხვალ ის დაიცავს „სამსახურში გადაწვისგან“, უპირატესობას მისცემს იმ სფეროებში, სადაც „ხანგრძლივად თამაში“, მოთმინება და ნებისყოფაა საჭირო. მედიცინა, ინჟინერია, საიუველირო საქმე, ციფრული ტექნოლოგიები.

შიში
“მშიშარას” და “მხდალის” იარლიყების უკან ფრთხილი და წინდახედული ბავშვი იმალება. შესანიშნავი ინტუიცია აქვს და კარგად ხვდება, საიდან მოდის საფრთხე ან სად იქმნება მისთვის არაკომფორტული სიტუაცია.

ბავშვი გრძნობს, როდის არ არის საჭირო ხმაური, ზედმეტი აქტიურობა, სცენაზე ასვლა და დემონსტრირება.

დღევანდელი „მშიშარა“ ბრწყინვალე მრჩეველი და კონსულტანტია. ბიზნესიდან დაწყებული, პრეზიდენტის აპარატით დამთავრებული, ის ყველაზე საჭირო მარჯვენა ხელი და ყოველთვის დაფასებული იქნება.

ამიტომ არ არის გამართლებული უხეშად ჩარევა და ბავშვის „გადაკეთება“, არამოსაწონი თვისებების გამოსასწორების დაჟინებული მცდელობა. ყველას თავისი ცხოვრების გზა აქვს, რომელზეც თავისი ბუნებრივი თვისებებით „შეიარაღებულმა“ უნდა იბრძოლოს.

წყარო: „mshoblebi.ge“