თბილისში წყლის ტარიფი არანორმალურად გაიზარდა

საქართველოს ენერგეტიკისა და წყალმომარაგების კომისიამ მხარი დაუჭირა დედაქალაქში სასმელი წყლის ტარიფის ზრდას. ახალი ტარიფი 2021 წლის პირველი იანვრიდან შევა ძალაში და 2023 წლის ჩათვლით იმოქმედებს. ახალი ტარიფის ორივე შემადგენელი კომპონენტი – “წყლის მიწოდება” და “წყალარინება” (კანალიზაცია) გაძვირებულია.

ახალი ტარიფები ასე განისაზღვრება:

1) გაუმრიცხველიანებელი აბონენტებისთვის საყოფაცხოვრებო ტარიფი ერთ სულზე თვეში 3.829 ლარი იქნება, რაც არსებულ ტარიფს 0.531 ლარით აღემატება.

2) გამრიცხველიანებული აბონენტებისთვის საყოფაცხოვრებო ტარიფი ერთ კუბურ მეტრზე 0.424 ლარი, რაც არსებულ ტარიფს 0.145 ლარით აღემატება;

3) არსაყოფაცხოვრებო ტარიფი ერთ კუბურ მეტზე 5.511 ლარი, რაც არსებულ ტარიფს 1.78 ლარით აღემატება.

სემეკის მიერ წარმოდგენილი ტარიფები დღგ-ის გარეშე არის მოცემული, შესაბამისად მათ 18% ემატებათ. ეს ნიშნავს, რომ საბოლოოდ:

– გაუმრიცხველიანებელი აბონენტებისთვის საყოფაცხოვრებო ტარიფი ერთ სულზე თვეში 4.51 ლარი იქნება;

– გამრიცხველიანებული აბონენტებისთვის საყოფაცხოვრებო ტარიფი ერთ კუბურ მეტრზე 0.50 ლარი იქნება;

– არსაყოფაცხოვრებო ტარიფი ერთ კუბურ მეტზე 6.50 ლარით განისაზღვრება;

დღეს ცნობილი გახდა, რომ მთავრობა თბილისში, მცხეთასა და რუსთავში სოციალურად დაუცველებისთვის წყლის ტარიფის მატებას სრულად დაასუბსიდირებს.