ავსტრიის პოლიციამ ქართველი დააკავა, რომელიც უნგრეთ-ავსტრიის საზღვარზე 20-მდე მიგრანტის გადაყვანას უკანონოდ ცდილობდა. – ინფორმაციას უცხოური მედია krone.at ავრცელებს
მედიაში გავრცელებული ინფორმაციის თანახმად ავსტრიის პოლიციამ უნგრეთის მხრიდან საზღვარზე გადასული ავტომობილი გააჩერა, ქართველმა მძღოლმა მიგრანტები მიატოვა და გაიქცა.
ის რამდენიმე საათის განმავლობაში ეინზერის ტბის ჭაობში იმალებოდა. პოლიციის ვერტმფრენის ჩართვის შემდეგ ქართველი ჭაობში აღმოაჩინეს. ის დაკავებულია და ამჟამად პოლიციას ჩვენებას აძლევს.
გამოძიება ვარაუდობს, რომ ქართველ მძღოლს მისი დანაშაულებრივი დაჯგუფების წევრებმა არასწორი ინფორმაცია მიაწოდეს, რომ ამ მხრიდან საზღვარი დაუცველია და ის სწორედ ამიტომ ცდილობდა ავსტრიაში შეღწევას აღნიშნული სასაზღვრო პუნქტის გავლით დღის საათებში.