“მთის ამბების” რედაქტორი გელა მთივლიშვილი სტიქიის ზონიდან ავრცელებს ინფორმაციას, რომლის მიხედვითაც, მეწყერში ამ ეტაპზე კიდევ ორი ცხედარია ნაპოვნი. ასევე საუბარია კიდევ 3 დაღუპულზე, მათ შორის, ერთ-ერთი ბავშვია.
„დაახლოებით ერთი საათის განმავლობაში ვიცით კიდევ რამდენიმე ცხედრის პოვნის შესახებ. რამდენიმე წუთის წინ დავადასტურეთ სულ მცირე 2 ცხედრის პოვნის შესახებ, რომლებიც ადგილობრივმა მცხოვრებლებმა აღმოაჩინეს, დადასტურებით ვიცით ეს ინფორმაცია. თუმცა, ჩვენ ვესაუბრეთ შსს-ს სტრატეგიული კომუნიკაციების დეპარამენტის ხელმძღვანელს, ის არ ადასტურებს ცხედრების პოვნის შესახებ ინფორმაციას. გუშინ იპოვეს 2 ცხედარი, ამ ეტაპზე კიდევ ორია ნაპოვნი, ვრცელდება ინფორმაცია, რომელსაც ჯერ ვერ ვაზუსტებთ, ზუსტად, რომ ვიცოდეთ, რომ კიდევ არის 3 ცხედარი ნანახი, მათ შორის, ერთი ბავშვი… რამდენიმე წუთის წინ ერთ-ერთი მამაკაცი უხმობდა მაშველებს, რომ თითქოს კიდევ ერთი ქალის ცხედარია ნაპოვნი“, – აღნიშნავს მთივლიშვილი.
შეგახსენებთ, გუშინ რაჭაში, შოვში, მჟავე წყლებთან, მეწყერი ჩამოწვა.
მეწყერმა რამდენიმე ათეული ადამიანი მოიყოლა, მათ შორის, ბავშვები.
სამძებრო სამუშაოები ამ დრომდე გრძელდება.