“გლობალური დათბობის ეპოქა დასრულდა, გლობალური დუღილის ეპოქა იწყება“ – ამის შესახებ გაეროს გენერალურმა მდივანმა ანტონიო გუტიერეშმა გაეროს შტაბ-ბინაში სიტყვით გამოსვლისას განაცხადა. მან ყურადღება გაამახვილა მსოფლიო მეტეოროლოგიური ორგანიზაციის მონაცემებზე და აღნიშნა, რომ ივლისი წლის ყველაზე ცხელი თვეა.
”ჩრდილოეთ ამერიკის, აზიის, აფრიკისა და ევროპის დიდი ნაწილისთვის სასტიკი ზაფხულია.
რეკორდული სიცხე, რომელიც გავლენას ახდენს მთელს მსოფლიოზე, კლიმატის ცვლილებითაა გამოწვეული და მიუხედავად იმისა, რომ ეს ფენომენი დიდი ხანია იწინასწარმეტყველეს, ცვლილებების ტემპი დამანგრეველია.
ყველა ქვეყანა ვალდებულია დაიცვას თავისი ხალხი სიცხისგან, ფატალური წყალდიდობისგან, ქარიშხლებისგან, გვალვისგან და მძვინვარე ხანძრებისგან.“
გაეროს გენერალურმა მდივანმა განვითარებულ ქვეყნებსაც მიმართა და მოუწოდა, რომ ყოველწლიურად 100 მილიარდი აშშ დოლარი გამოყონ განვითარებად ქვეყნებში კლიმატის ცვლილებასთან საბრძოლველად.