ქართველი ჩოგბურთელის, ნიკოლოზ ბასილაშვილის კორტზე დაბრუნება გადაიდო, მას ისევ ხელის ტრავმა აწუხებს, – ამის შესახევ ინფორმაცია ბასილაშვილმა თავად გაავრცელა სოციალურ ქსელში.
ბასილაშვილს მარჯვენა ხელის ტრავმა დიდი ხნის მანძილზე აწუხებდა, მან ოპერაცია ივნისის დასაწყისში გაიკეთა. როგორც ჩოგბურთელი აცხადებდა, ტკივილი საკუთარი შესაძლებლობების სრულად გამოვლენის საშუალებას არ აძლევდა.
ორი ოპერაციის შემდეგ ქართველი ჩოგბურთელი კორტზე დასაბრუნებლად აქტიურად ემზადებოდა. მას ჰამბურგის 500-ქულიან ტურნირში უნდა მიეღო მონაწილეობა, რომლის ჩემპიონიც 2018 და 2019 წლებში გახდა, თუმცა იდაყვის არეში ტკივილს ისევ გრძნობდა და მესამე ოპერაცია დასჭირდა.
“მოსამზადებელი პერიოდის დროს იდაყვის არეში ტკივილს ისევ ვგრძნობდი, რის გამოც მესამე ოპერაციის ჩატარება გახდა საჭირო. ვიმედოვნებ, მომდევნო თვის მანძილზე ტკივილის გარეშე მომზადებას შევძლებ“, – დაწერა ბასილაშვილმა