ნესვი გარდა იმისა, რომ გემრიელი და არომატულია, ვიტამინებითა და მიკროელემენტებით მდიდარი, ადამიანის ორგანიზმისთვის სასარგებლო ბაღჩეულია. მისი რბილობის 95 პროცენტი წყალია. შეიცავს შაქარს, კალციუმს, რკინას, თუთიას, ცხიმებს, A, B, C და P ვიტამინებს. ნესვი შესანიშნავად ახერხებს ნაწლავების გაწმენდას, რაც უმალვე აისახება ადამიანის კანის ფერსა და მდგომარეობაზე.
გაითვალისწინეთ, რომ ნესვის დიეტა არ შეიძლება მათთვის, ვისაც აქვს შაქრიანი დიაბეტი, კუჭის ან თორმეტგოჯას წყლული. ვისაც სიმსუქნისკენ გაქვთ მიდრეკილება, გახდომაში ნესვი დაგეხმარებათ: ერთი კვირის განმავლობაში, ყოველდღე მიირთვით 2 კილოგრამი ნესვის რბილობი. ის აღადგენს ნივთიერებათა ცვლას, გაწმენდს ნაწლავებს და მოგაშორებთ ზედმეტ კილოგრამებს. ამ დიეტას ორგანიზმიდან გამოაქვს წიდა და ტოქსინები, წვავს ცხიმებს.
ნესვი საკმარისი რაოდენობით მოგაწვდით აუცილებელ ვიტამინებსა და მინერალებს, არც შიმშილი შეგაწუხებთ და არც სისუსტე. ამ დიეტის დროს, რაციონიდან უნდა ამოიღოთ კარტოფილი, პური, მაკარონი და ტკბილეული. რეკომენდებულია უმარილო, მოხარშული ბრინჯი, ბოსტნეულის სალათა, უცხიმო ხაჭო. დღეგამოშვებით შეგიძლიათ, მიირთვათ მოხარშული თევზი ან 150 გრამი ქათამი, სვათ უშაქრო მწვანე ჩაი.
ნესვის მთელი დღის ულუფა ხუთად უნდა გაიყოს. ერთი ნაწილი შუადღისას მიირთვით, დანარჩენი ოთხი კი, ყოველ ორ საათში, ჭამის შემდეგ.